ارنايى قوسىمشا «قاۋىپتى» جۇرگىزۋشىنىڭ كەلە جاتقانىن اۆتوماتتى تۇردە حابارلايدى - ءى ءى م

استانا. قازاقپارات - ق ر ىشكى ىستەر ءمينيسترى مارات احمەتجانوۆ جول ەرەجەسىن بۇزعانداردى انىقتايتىن «قورعاۋ» قوسىمشاسىنىڭ باستاپقى كورسەتكىشتەرىن جاريالادى، دەپ حابارلايدى قازاقپارات ءتىلشىسى.

«قازىرگى ۋاقىتتا ەرەكشە قاۋىپ توندىرەتىندەر - ەرەجەنى ورەسكەل بۇزۋشىلار. 71 مىڭ وسىنداي جۇرگىزۋشى جول ەرەجەسىن 6 دان 150 رەتكە دەيىن بۇزعان. قازىر ءبىزدىڭ باستامامىزبەن، 6 قالادا (استانا، الماتى، شىمكەنت، وسكەمەن، اتىراۋ جانە تۇركىستان) «قورعاۋ» قوسىمشاسى ىسكە قوسىلدى. بۇل جالعان نومىرلەرى بار، ساقتاندىرۋ پوليسى جوق، ىزدەۋدە جۇرگەن نەمەسە جول ەرەجەسىن جۇيەلى تۇردە بۇزاتىن جانە ايىپپۇل تولەمەي جۇرگەن جۇرگىزۋشىلەردى انىقتايدى»، - دەدى مارات احمەتجانوۆ ۇكىمەتتىڭ وتىرىسىندا.

بۇعان دەيىن، مۇنداي فاكتىلەر كولىكتەردى توقتاتىپ، ولاردىڭ قۇجاتتارىن جەكە تەكسەرۋدە عانا انىقتالاتىن. ال قازىر، «قورعاۋ» قوسىمشاسى كوشەدەگى كامەرالاردىڭ دەرەكتەرىن تالداپ، پوليتسەيدىڭ پلانشەتىنە «قاۋىپتى» جۇرگىزۋشى كەلە جاتقانىن اۆتوماتتى تۇردە حابارلايدى. تەز ارادا ورەسكەل بۇزۋشىنىڭ جولى كەسىلەدى.

«قوسىمشا ارقىلى جالعان نومىرمەن جۇرگەن 604 فاكتى انىقتالدى. 1609 جۇرگىزۋشى كۋالىگىنەن ايىرىلدى. 2400 مەملەكەتتىك ءنومىر تاركىلەندى. ايىپپۇل تۇراعىنا 8 مىڭ اۆتوكولىك قامالدى. وڭىرلەردىڭ اكىمدەرىنە بارلىق ءىرى ەلدى مەكەندەردە وسى جۇيەنى ەنگىزۋ جۇمىسىن قولعا الۋ كەرەك. بۇل - جولداعى مادەنيەتتى ارتتىرۋعا جانە جازانىڭ بۇلتارتپاستىق پرينسيپىن قامتاماسىز ەتۋگە مۇمكىندىك بەرەدى»، - دەدى مارات احمەتجانوۆ.