جاتاقحانا تاپشىلىعى ماسەلەسى قالاي شەشىلەدى - عىلىم ءمينيسترى
«جاتاقحانا ماسەلەسى راسىندا بار، بۇل ءبىر كۇن ەمەس، ءبىر جىل ەمەس، ونداعان جىلدار بويى قوردالانعان ماسەلە. اسىرەسە الماتى قالاسىندا وتە وزەكتى بولىپ وتىر، سەبەبى وندا 36 جوعارى وقۋ ورنى بار، ەلىمىزدىڭ بارلىق ستۋدەنتتەرىنىڭ ۇشتەن ءبىرى الماتىدا، ولاردىڭ %70 ى باسقا قالالاردان كەلگەندەر. ءبىز قازىر الماتى قالاسى بويىنشا ۇلكەن ءىس- شارالار كەشەنىن جۇرگىزىپ جاتىرمىز، جاتاقحانالار قۇرىلىسىنا جەكە كاپيتالدى تارتۋ، اكادەميالىق ينفراقۇرىلىمدى كەڭەيتۋ ءۇشىن ينۆەستورلارمەن كەزدەستىك. الماتىدا جەكە شتاب قۇرىلدى، قيىن جاعدايعا تاپ بولعان ستۋدەنتتەردى ۋاقىتشا ورنالاستىرامىز، ولارعا باسپانا ىزدەيمىز»، - دەپ جاۋاپ بەردى مينيستر ورتالىق كوممۋنيكاتسيالار قىزمەتىندە جۋرناليستىڭ سۇراعىنا.
ءمينيستردىڭ ايتۋىنشا، قازىرگى ۋاقىتتا قيىن جاعدايعا تاپ بولعان 130 ستۋدەنتكە كومەك كورسەتىلدى.
«ماسەلەنى تولىق شەشۋ ءۇشىن بولەك جۇيەلى شارالار قاجەت. سوندىقتان جولداۋدا بەرىلگەن تاپسىرمالارعا سايكەس، كەلەسى جىلدان باستاپ ۋنيۆەرسيتەتتەرگە قاتاڭ تالاپتار قويامىز. ەگەر ۋنيۆەرسيتەت جاڭا ماماندىق اشقىسى كەلسە، وسى جاڭا ماماندىق بويىنشا ستۋدەنتتەردى تارتقىسى كەلسە نەمەسە جاڭا ۋنيۆەرسيتەت اشىلسا، جاتاقحانالارمەن %100 قامتاماسىز ەتۋ جونىندە قاتاڭ تالاپ قويىلادى. ايتالىق، ج و و جاڭا ماماندىققا 100 ستۋدەنتتى تارتقىسى كەلسە، 100 توسەك- ورىنمەن قامتاماسىز ەتۋى قاجەت.
ءارى قاراي جاتاقحانا ماسەلەسى قالانى دامىتۋ اياسىندا قولعا الىنباق، ونى اكىمدىكتەن ناقتىلاۋ قاجەت. شىنىندا دا، سۇلەيمەن دەميرەل سەكىلدى بىرنەشە جەكەمەنشىك ۋنيۆەرسيتەت وزدەرىنىڭ كامپۋستارىن قالا سىرتىنا شىعارىپ جاتىر، جاڭادان قۇرىلعان جەتىسۋ وبلىسىندا دا الماتىدان تالاپكەرلەردىڭ ءبىر بولىگىن تارتۋ ءۇشىن ۋنيۆەرسيتەت ينفراقۇرىلىمىن دامىتۋ بويىنشا ۇلكەن باعدارلاما جوسپارلانۋدا»، - دەدى ساياسات نۇربەك.
بۇعان دەيىن عىلىم جانە جوعارى ءبىلىم ءمينيسترى ءوز بالالارىنىڭ قايدا ءبىلىم الىپ جاتقانى تۋرالى جۋرناليستەر سۇراعىنا جاۋاپ بەرگەن ەدى.
سونىمەن بىرگە، 2500 قازاقستاندىق ستۋدەنت رەسەي مەن ۋكراينادان وتاندىق ج و و- لارعا اۋىسقان.
