نەگە اكىمدەر جىلدار بويى ءبىر لاۋازىمدا وتىرادى؟

مەملەكەتتىك قىزمەت ىستەرى اگەنتتىگى وكىلى كەيبىر اكىمدەر نەگە جىلدار بويى ءبىر لاۋازىمدا وتىراتىنىن ءتۇسىندىردى، - دەپ حابارلايدى Massaget.kz ءتىلشىسى.

ۆەدومستۆو مالىمەتىنشە، قازىر اۋداندىق ماڭىزى بار قالا، اۋىل، كەنت نەمەسە اۋىلدىق وكرۋگ اكىمدەرى ءتورت جىل مەرزىمگە سايلانادى. ءبىر ادام ەكى رەتتەن ارتىق سايلانا المايدى. تيىسىنشە، مۇنداي لاۋازىمدا وتىرۋدىڭ جالپى مەرزىمى سەگىز جىلدان اسپاۋى كەرەك. الايدا مۇنداي شەكتەۋ 2021 -جىلدىڭ 24-مامىرىندا عانا ەنگىزىلگەن.

مەملەكەتتىك قىزمەت ىستەرى اگەنتتىگىنىڭ قوعاممەن بايلانىس دەپارتامەنتىنىڭ ديرەكتورى اراي ىزبايەۆ اۋداندىق ماڭىزى بار قالا، اۋىل، كەنت نەمەسە اۋىلدىق وكرۋگ اكىمدەرى «ب» كورپۋسىنىڭ مەملەكەتتىك قىزمەتشىلەرىنە جاتاتىنىن اتاپ ءوتتى. ولاردى ەلدى مەكەن تۇرعىندارى جالپىعا بىردەي، تەڭ جانە توتە سايلاۋ قۇقىعى نەگىزىندە جاسىرىن داۋىس بەرۋ ارقىلى سايلايدى. اكىم رەتىندە 25 جاستان كىشى ەمەس قازاقستان ازاماتى قاتارىنان ءتورت جىل مەرزىمگە سايلانادى. وسى لاۋازىمعا كەلگىسى كەلەتىن ۇمىتكەرلەر مىنا ولشەمدەرگە ساي كەلۋى كەرەك:

- جوعارى نەمەسە ورتا بىلىمنەن كەيىنگى نەمەسە تەحنيكالىق جانە كاسىپتىك ءبىلىمى بولۋى؛

- جۇمىس تاجىريبەسى - مەملەكەتتىك لاۋازىمداردا ەكى جىلدان نەمەسە لاۋازىمنىڭ فۋنكتسيونالدىق باعىتتارىنا سايكەس سالالاردا ءتورت جىلدان كەم ەمەس، ونىڭ ىشىندە باسشىلىق لاۋازىمداردا ەكى جىلدان كەم ەمەس قىزمەت ەتۋى.

اكىمنىڭ وكىلەتتىگى مىناداي جاعدايلاردا توقتاتىلادى:

- اكىم قايتىس بولسا؛

- اكىمدى ىسكە قابىلەتسىز نەمەسە قابىلەتى شەكتەۋلى دەپ تانۋ تۋرالى سوت شەشىمى زاڭدى كۇشىنە ەنگەندە؛

- حابار- وشارسىز كەتكەندە نەمەسە ونى قايتىس بولدى دەپ جاريالاۋ تۋرالى سوت شەشىمىمەن؛

- ساياسي پارتياعا مۇشەلىكتى توقتاتۋ تۋرالى؛

- جوعارى تۇرعان اكىمنىڭ ءماسليحات دەپۋتاتتارىنىڭ اكىمگە قاتىستى سەنىمسىزدىك ۆوتۋمىن قابىلداۋى؛

- قازاقستان ازاماتتىعىن توقتاتقاندا؛

- سايلاۋ كوميسسياسىنىڭ جاڭا سايلانعان اكىمدى تىركەۋىنە؛

- قازاقستان زاڭدارىندا كوزدەلگەن وزگە دە جاعدايلاردا توقتاتىلادى.

«اكىمگە سەنىمسىزدىك ءبىلدىرۋ تۋرالى ءماسليحاتتىڭ ماسەلە قاراۋى ءۇشىن جەرگىلىكتى قوعامداستىق جينالىسىنىڭ اكىمدى قىزمەتىنەن بوساتۋ تۋرالى ماسەلەگە باستاما كوتەرۋى نەگىز سانالادى. مەملەكەتتىك قىزمەت ىستەرى اگەنتتىگى مەملەكەتتىك ورگانداردىڭ نەمەسە لاۋازىمدى تۇلعالاردىڭ مەملەكەتتىك قىزمەت سالاسىنداعى زاڭنامانى بۇزۋى، سونداي-اق، قىزمەتتىك ادەپتى ساقتاۋ ماسەلەلەرى بويىنشا ارەكەتتەرى (ارەكەتسىزدىگى) مەن شەشىمدەرىنە قاتىستى جەكە جانە زاڭدى تۇلعالاردىڭ شاعىمدارىن قارايدى.

بيىل ءبىرىنشى جارتىجىلدىقتا اۋىلدىق وكرۋگتەردەن اگەنتتىككە ءوتىنىش تۇسكەن جوق»، - دەپ قورىتىندىلادى ۆەدومستۆو وكىلى.

سونداي-اق، ىزبايەۆ جەتىسۋ جانە الماتى وبلىستارىنداعى «ۇزاق وتىرعان» اكىمدەر تۋرالى سۇراققا جاۋاپ بەردى.

«جاۋاپكەرشىلىكتى بەلگىلەيتىن نەمەسە كۇشەيتەتىن زاڭداردىڭ كەرى جاعى بولمايدى. ساعادي تالدىبايەۆ 2020 -جىلدىڭ 24-ماۋسىمىندا جەتىسۋ وبلىسى كوكجازىق اۋىلىنىڭ اكىمى بولىپ قايتا سايلاندى. ول تىكەلەي سايلاۋ قۇقىعى قابىلدانعانعا دەيىن سايلاندى.

ال الماتى وبلىسى بايتەرەك اۋىلىنىڭ اكىمى ايبەك نۇرلانوۆ 2021 -جىلدىڭ 25-شىلدەسىندە جاڭا تالاپتارعا سايكەس ءتورت جىل مەرزىمگە قىزمەتكە سايلاندى»، - دەپ ءتۇسىندىردى اراي ىزبايەۆ.