وقۋ اقىسىن تولەۋگە قينالعان اتا- انالار ۋينۆەرسيتەت باسشىلىعىنان كومەك سۇراي الادى

نۇر- سۇلتان. قازاقپارات - جوعارى وقۋ ورىندارىنداعى باعا ساياساتى تۋرالى تۇسىنىكتەمە بەرگەن ق ر عىلىم جانە جوعارى ءبىلىم مينيسترلىگى جوعارى جانە جوعارى وقۋ ورنىنان كەيىنگى ءبىلىم دەپارتامەنتى ديرەكتورىنىڭ ورىنباسارى ەرجان امىربەك ۇلى اتا- انالاردى سابىر ساقتاۋعا شاقىردى، دەپ حابارلايدى قازاقپارات ءتىلشىسى.

«اتا- انالاردان سابىر ساقتاۋدى سۇرايمىن. بۇگىندە ولاردا مۇمكىندىك بار. ەگەر اتا- انالارعا ارنايى كومەك كەرەك بولسا، ۋنيۆەرسيتەتتىڭ وقۋ اقىسىن تولەي الماي، قارجىلىق جاعىنان قيىندىققا تاپ بولسا، سول جوعارى وقۋ ورنىنىڭ باسشىلىعىنا ءوتىنىش جازىپ، ءتيىستى كومەك الۋعا مۇمكىندىگى بار»، - دەدى دەپارتامەنت باسشىسىنىڭ ورىنباسارى.

سونداي- اق، ەلدەگى جوعارى وقۋ اقىسىنىڭ باعاسىنا مينيسترلىك تاراپىنان مونيتورينگ جاسالاتىنىن اتاپ ءوتتى.

«ءبىزدىڭ مونيتورينگكە سۇيەنسەك، مەملەكەتتىك نىسانداعى ۋنيۆەرسيتەتتەردىڭ، سونىڭ ىشىندە ۇلتتىق ۋنيۆەرسيەتتەردىڭ نەگىزگى بولىگىندە باعا ساياساتى وزگەرگەن جوق. جەكەلەگەن وقۋ ورىندارى عانا بار. مىسالى، ءال- فارابي اتىنداعى قازاق ۇلتتىق ۋنيۆەرسيتەتىن الايىق. وندا بىلتىر وقۋدىڭ اقىسى 1 ميلليون تەڭگە بولدى. قازىر كوپتەگەن ماماندىق بويىنشا، وقۋدىڭ باعاسى 1 ميلليون تەڭگە دەڭگەيىندە قالىپ وتىر. جەكەلەگەن باعىتتار بويىنشا 1 ميلليون 50 مىڭ تەڭگە، 1 ميلليون 100 مىڭ تەڭگە ارالىعىندا، ياعني باعانىڭ ديففەرانساتسياسى بولۋى مۇمكىن.

ل. گۋميليەۆ اتىنداعى ەۋرازيا ۇلتتىق ۋنيۆەرسيتەتىندە بىلتىر وقۋدىڭ باعاسى 1 ميلليون 50 مىڭ تەڭگە بولدى. قازىرگى باعا 1 ميلليون 100 مىڭ تەڭگە دەڭگەيىندە بولىپ وتىر.

جالپى قازاقستاندا 120 جوعارى وقۋ ورنى بار. ونىڭ 103 ءى ازاماتتىق باعىتتاعى ۋنيۆەرسيتەت، قالعاندارى ارنايى جوعارى وقۋورىندارى. بۇگىندە ەلىمىزدە 600 مىڭداي ستۋدەنت بار»، - دەدى ەرجان امىربەك ۇلى.