تۇركيادا قوي بورداقىلاپ، ەگىن ەگۋمەن اينالىساتىن قانداسىمىز تۋرالى نە بىلەمىز

نۇر-سۇلتان. قازاقپارات - تۇركيادا اۋىل شارۋاشىلىعىمەن اينالىسىپ، قازاقتىڭ سالت- ءداستۇرىن ۇمىتپاعان قانداستارىمىز جەتەرلىك.

سونىڭ ءبىرى - جانىبەك شولپان. ول قوي بورداقىلاپ، ەگىن ەگىپ، قولونەرمەن اينالىسىپ ءجۇر، دەپ جازادى world-nan.kz.

جانىبەك شولپان ستامبۋلدا ومىرگە كەلگەن. ونىڭ اتا-بابالارى تۇركياعا وتكەن عاسىردا قونىس اۋدارىپتى. وسىعان قاراماستان قانداسىمىزدىڭ جانۇياسى ءداستۇردى ساقتاپ، انا تىلىندە سويلەۋگە تىرىسادى. ءتىپتى ۇلتتىق قولونەرمەن دە اينالىسىپ ءجۇر.

«ەكى قىزىم ءوسىپ، تۇرمىسقا شىققان ۋاقىتتا ءومىرىمنىڭ وزگەرگەنىن ءتۇسىندىم. نەمەرەلەر ومىرگە كەلىپ، ولار وزدەرىنە تارتا ءتۇستى. ناتيجەسىندە ستامبۋلدى تاستاپ، فاكلى اۋىلىنا كوشىپ كەلدىم. ەلدىمەكەن كىركلاريلي قالاسىنا جاقىن جەردە ورنالاسقان. وندا قىزدارىم مەن قۇدالار تۇرادى»، - دەدى ول.

ونىڭ سوزىنشە، قونىس اۋدارعان جەرى اۋىلشارۋاشىلىق سالاسىنا وتە قولايلى بولعان. قانداسىمىز بىرنەشە باس قوي ساتىپ الىپ، بورداقىلاۋمەن اينالىسا باستاعان. تۇركيادا كاسىپتى جاڭادان باستاعاندار ءۇشىن قوي شارۋاشىلىعى وتە ءتيىمدى كاسىپ. الايدا جەرگىلىكتى تۇرعىندار مايلى ەتتى اسا ۇناتا بەرمەيدى، دەيدى ول.

«قويلاردى سويماي ساتامىز. ولاردى 20-25 كەلى بولعان ۋاقىتتا ساتىپ الامىن. ءتورت تۇلىك كۇنىنە ورتا ەسەپپەن 350 گرامم قوسادى. 30 كۇندە 10 كەلى سالماققا يە بولىپ شىعادى. 50-52 كۇندە بورداقىلاۋعا نەمەسە ساتۋعا مۇمكىندىك بولادى. ءبىز قويدىڭ سالماعىن 38-40 كەلىدەن اسىرماۋعا تىرىسامىز. مايلى ەت مۇندا قاتتى تانىمال ەمەس. وسىلاي جۇمىس ىستەيمىن»، - دەدى جانىبەك. ونىڭ ايتۋىنشا، سويىلماعان مالعا دەگەن سۇرانىس تۇرىكتەر اراسىندا عانا ەمەس، جەرگىلىكتى قازاقتار اراسىندا دا وتە جوعارى.

تۇركيادا تۇراتىن 25 مىڭ قانداستىڭ 10 مىڭى ستامبۋلدا مەكەندەيدى. ايىنا 500-گە جۋىق قويدى تەك قازاق دياسپوراسىنىڭ وكىلدەرى ساتىپ الادى ەكەن. سوندىقتان نارىقتا سۇرانىس ءارقاشان دا بار، دەيدى ول. وتكەن جىلدان باستاپ جانىبەك مال ازىعى ءۇشىن بيداي ەگۋدى باستاعان. ونىڭ شارۋاشىلىعىنا بالالار قول ۇشىن بەرىپ ءجۇر. قانداسىمىز بولاشاقتا جىلقى وسىرگىسى كەلەتىنىن دە جاسىرمادى. «مەنىڭ كوشپەندىلەرگە ءتان قانىم بار. جەردى جانە ءتورت تۇلىكتى جاقسى كورەمىن. ەندى جىلقى باپتاعىم كەلەدى. وسىندا تۇراتىنى كورشىلەرىم مەن قۇدالارىما ۇلتتىق سۋسىندى ۇسىنعىم كەلەدى. قازىر ارمانىم ورىندالدى. ومىرىمدە قازاققا ءتان ىسپەن اينالىسىپ جاتىرمىن. بۇل مەنىڭ باقىتىم»، - دەدى جانىبەك.