ەلىمىزدەگى قۇس وسىرۋشىلەرگە كومەك كەرەك
سالانى تولعاندىرعان تۇيتكىل بۇل عانا ەمەس. كەلتىرىلگەن كەدەرگىگە قاراماستان، شارۋالار ىشكى نارىقتى وتاندىق ونىممەن قامتۋعا ارەكەت ەتىپ جاتىر. قۇس وسىرۋشىلەرگە ارزان جەم الۋ ءۇشىن 200 ميلليارد تەڭگە كولەمىندە كومەك كورسەتىلدى. جۇمىرتقا وندىرۋگە دە سۋبسيديا بولىنەدى. ءبىراق شارۋالار شىعىنى ءالى دە شاش- ەتەكتەن. ياعني قولداۋدان قايىر بولماي تۇر. ويتكەنى استىق قىمبات، ال بولىنگەنى جەتپەيدى. مامانداردىڭ ايتۋىنشا، ءونىم قۇنىنىڭ 70 پروتسەنتىن وسى جەم- ءشوپ قۇرايدى.
قۇس وسىرۋشىلەر وداعىنىڭ پرەزيدەنتى رۋسلان ءشارىپوۆ استىقتان باسقاسىنىڭ ءبارى سىرتتان اكەلىنەتىنىن مالىمدەدى. نارىقتاعى احۋال كوپكە ايان. ۆاليۋتا باعامى، لوگيستيكا، قىمباتشىلىق ماسەلەسى بۇل سالانى دا اينالىپ وتپەسى حاق. ال جۇمىرتقا وندىرۋشىلەر قاۋىمداستىعىنىڭ جەتەكشىسى ماكسيم بوجكو قوستاناي مەن قاراعاندى وبلىسىنداعى قۇس فابريكالارى جىل باسىنان بەرى جارتى ميلليارد تەڭگە جوعالتقانىن ايتادى. سەبەبى سول وندىرىسكە قاجەت دارۋمەندەر، قۇس تۇماۋىنا قارسى ۆاكسينا ءبارى قىمبات ءارى قارىزعا الىنادى. سوندا دا شارۋالار ىشكى نارىقتى تۇگەلدەي وتاندىق جۇمىرتقامەن قامتىعان. الداعى 3 جىلدا قولدانىستاعى قۇس ەتى دە تەك قازاقستاندىكى بولماق.
اۋە وتىنى ءوندىرىسى ارتتىرىلادى
ال ەلدەگى اۋە كومپانيالارىن وتاندىق وتىنمەن قامتۋ ءۇشىن ءوندىرىستى 1,5 ەسە ارتتىرۋ قاجەت. ەنەرگەتيكا مينيسترلىگى وسىلايشا رەسەيلىك ونىمگە تاۋەلدىلىكتى ازايتپاقشى. ايتپەسە كورشىلەر ۇسىنعان وتىن تاسىمالى قالتاعا سالماق سالىپ تۇر. ونىڭ ۇستىنە ءالى دە 300 مىڭ توننا اۋە وتىنىنا تاپشىلىق بايقالادى. ال ۇشۋ كورسەتكىشى قالپىنا كەلتىرىلگەن سايىن تۇتىنۋ ۇلەسى دە ارتىپ بارادى. اي سايىن اۋە كومپانيالارى 90 مىڭ توننا وتىن جاعادى. ەندى ماماندار ىشكى نارىقتاعى تاپشىلىقتى جويۋ ءۇشىن جىلداعى ءوندىرىس كولەمىن 1 ميلليون تونناعا ارتتىرۋ قاجەت دەيدى.
بۇگىندە مەملەكەت اۆيا وتىن باعاسىن رەتتەمەيدى. ءبىراق قۇزىرلى مينيستر بىزدەگى باعانىڭ ەۋروپاعا قاراعاندا ارزان ەكەنىن اتاپ ءوتتى. ال وندىرىلگەن ءونىمنىڭ 10 پروتسەنتى تاۋارلىق بيرجا ارقىلى ساتىلاتىن. كەلەشەكتە وسى كورسەتكىش ەكى ەسە ۇلعايۋى ىقتيمال.
ديزەل تاپشىلىعى
جاھاندىق ديزەل نارىعى دا تىعىرىققا تىرەلدى. ا ق ش وسىنداي وتىن قورىن ارتتىرعان جوق. ءتىپتى ەلدە 32 جىلداعى رەكوردتىق تومەندەۋ تىركەلدى. قازىر مۇندا 109 ميلليون باررەل ديزەل وتىنى بار. ەلدە ءبىر جىلدا ءونىم 70 پروتسەنتكە قىمباتتاعان. ال ەۋرو وداقتاعى جاعداي ءتىپتى مۇشكىل. كومپانيالارعا رەسەي ديزەلىن الۋعا تىيىم سالىنباق، ءبىراق بالاما كوزدەرى ۇسىنىلماعان.
مەملەكەتتەر گازدان مۇناي ونىمدەرىنە كوشۋدى جوسپارلاپ وتىر. سول سەبەپتى كاسىپكەرلەر بارىنشا قور جيناۋعا تىرىسىپ باعۋدا. ءبىر جىلدا رەسەيلىك ديزەل قۇنى وداق ءۇشىن 22 پروتسەنتكە ءوسىپ كەتكەن. يمپورت تا باسقا مەملەكەتتەرگە قاراعاندا 200 مىڭ باررەلگە ارتىق جاسالدى.
www.24.kz
