يادرولىق قارۋ - تەجەۋ قۇرالى ەمەس، ناعىز زۇلىمدىق - قازاقستان مەن جاپونيا وكىلدەرى
بۇل تاقىرىپتى قازاقستاننىڭ ب ۇ ۇ جانىنداعى ميسسياسى مەن جەردىڭ يادروسىز بولاشاعىن بەلسەندى تۇردە جاقتايتىن جاپوندىق «سوكا گاككايا» ءىرى ۇكىمەتتىك ەمەس ۇيىمى يادرولىق قارۋدى تاراتپاۋ تۋرالى شارتقا قاتىسۋشىلاردىڭ 10-شى شولۋ كونفەرەنسياسىندا تالقىلادى.
بۇل تۋرالى قازاقپارات ب ۇ ۇ جاڭالىقتار ورتالىعىنا سىلتەمە جاساپ حابارلايدى.
«يادرولىق قارۋدى تاراتپاۋ تۋرالى شارت جونىندەگى 10-شولۋ كونفەرەنتسياسى پاندەمياعا بايلانىستى ۇنەمى كەيىنگە شەگەرىلىپ كەلگەن اسا ماڭىزدى وقيعا. بۇل كونفەرەنتسيانىڭ بۇعان دەيىنگىلەردەن ايىرماشىلىعى - ول قازىر ۋكراينادا قالىپتاسىپ جاتقان جاعداي اياسىندا وتۋدە. ءبىز يادرولىق قارۋدى قولدانۋ مۇمكىندىگى تۋرالى سوزدەر ەستىپ جاتىرمىز. وسىلايشا، كەيبىر ەلدەر مەن ساياساتكەرلەر ءۇشىن ارتتا قالعان يادرولىق قارۋسىزدانۋ ماسەلەلەرى قازىر وزەكتى بولا باستادى»، - دەدى قازاقستاننىڭ ب ۇ ۇ جانىنداعى تۇراقتى وكىلى ماعجان ءىلياسوۆ ب ۇ ۇ جاڭالىقتار قىزمەتىنە بەرگەن سۇحباتىندا.
كونفەرەنتسيا اياسىندا وتكەن شاراعا ساراپشىلار، ديپلوماتتار، ازاماتتىق قوعام وكىلدەرى، سونداي-اق «حيباكۋسيا» قاتىستى.
جاپونياداعى حيروسيما مەن ناگاساكيدەگى جارىلىستاردان امان قالعاندار «حيباكۋسيا» دەپ اتالادى. بيىل ب ۇ ۇ باس حاتشىسى انتونيۋ گۋتەرريش حيروسيماداعى اتوم جارىلىسى قۇرباندارىن ەسكە الۋ راسىمىنە قاتىسادى. بۇل جاپونيانىڭ وسى قالاسىندا 6-تامىزدا وتەدى.
ب ۇ ۇ باسپا ءسوز قىزمەتىنىڭ حابارلاۋىنشا، باس حاتشى الەم كوشباسشىلارىن يادرولىق قارۋ قورلارىن كىدىرىسسىز جويۋعا شاقىرماق. سونداي-اق ول «حيباكۋسيامەن» كەزدەسىپ، بەلسەندى جاستارمەن ديالوگقا تۇسەدى.
حيروتسۋگۋ تەراساكيدىڭ ايتۋىنشا، «سوكا گاككايا» ۇيىمى يادرولىق قارۋدى «ابسوليۋتتى زۇلىمدىق» دەپ ساناپ، ونىمەن كۇرەسۋ ءۇشىن ولار «حيباكۋسيا» ءۇنىن بۇكىل الەمدەگى ەڭ كەڭ اۋديتورياعا جەتكىزۋگە كومەكتەسىپ كەلەدى. اتوم بومباسىنىڭ سىناعى جۇرگىزىلگەن قازاقستان - يادرولىق قارۋسىز الەم ءۇشىن قوزعالىستىڭ بەلسەندى قاتىسۋشىسى.
