الماتىدا بيلەتى جوق جولاۋشى پويىز ۆاگونىنىڭ توبەسىنە شىعىپ العان - ۆيدەو

الماتى. قازاقپارات - الماتىدا بيلەتسىز ەر ادام دىتتەگەن جەرىنە پويىز ۆاگونىنىڭ شاتىرىندا جاتىپ جەتىپ الماق بولعان، دەپ حابارلايدى قازاقپارات ءتىلشىسى.

ۆيدەو الەۋمەتتىك جەلىدە تارادى. وندا ورنىنان قوزعالىپ بارا جاتقان پويىز ۆاگونىنىڭ ءبىرىنىڭ ۇستىندە ەر ادام جاتقانىن كورۋگە بولادى. كولىكتەگى پوليتسيا دەپارتامەنتىنىڭ باسپا ءسوز قىزمەتىنەن ءمالىم ەتكەندەي، وقيعا 24-شىلدە كۇنى ساعات 22:45-تە بولعان.

«الماتى-1» ستانسياسىنداعى كەزەكشى بولىمشەگە «الماتى-2» ستانسياسىنان «الماتى- ورال» پويىزىنىڭ ماشينيسىنەن ۆاگوننىڭ توبەسىنە شىعىپ، جاتىپ العان ەر ادامنىڭ كەسىرىنەن پويىز شۇعىل توقتاتىلعانى تۋرالى حابارلاما ءتۇستى.

«پويىز توقتاعاننان كەيىن كولىك پوليتسەيلەرى قۇقىقبۇزۋشىنى اكت بويىنشا ۆاگوننىڭ توبەسىنەن ءتۇسىردى. تەكسەرۋ بارىسىندا ونىڭ باتىس قازاقستان وبلىسىنىڭ 47 جاستاعى تۇرعىنى ەكەنى انىقتالدى. جاۋاپ الۋ بارىسىندا ەر ادام بيلەت الۋعا اقشاسى جوعىن ايتىپ، پويىزدىڭ توبەسىندە ۇيىنە جەتۋدى ۇيعارعان»، - دەپ حابارلادى كولىكتەگى پوليتسيا دەپارتامەنتىنىڭ باسپا ءسوز قىزمەتىنەن. اتالعان ازاماتقا قاتىستى ق ر ا ق ب ت ك-نىڭ 560-بابى بويىنشا 5 ا ە ك كولەمىندە ايىپپۇل سالىندى.