اباي وبلىسىنان ەرتە قولا ءداۋىرىنىڭ ەسكەرتكىشتەرى تابىلدى

نۇر-سۇلتان. قازاقپارات - ەۋرازيا ۇلتتىق ۋنيۆەرسيتەتىنىڭ ارحەولوگتارى اباي وبلىسىنىڭ اباي اۋدانىنان ەرتە قولا ءداۋىرىنىڭ ەسكەرتكىشتەرىن تاپتى.

«شىڭعىستاۋ» ەكسپەديتسياسىنىڭ مۇشەلەرى «سەمەي- قاراۋىل» تاس جولى بويىنان 3500 جىل بۇرىنعى قورىمداردى انىقتادى. مامىر ايىنان بەرى جۇرگىزىلگەن زەرتتەۋلەر ناتيجەسىندە عالىمدار تۇرمىستىق زاتتار مەن تاستاعى جازۋلاردى كەزدەستىرگەن. ارحەولوگتاردىڭ ايتۋىنشا، جىلقىنى قوسا جەرلەۋ ءداستۇرى سول زاماندا دا بولعان.

«وردا ەسكەرتكىشى» دەگەن اتاۋ بەرىلگەن قورىم جيدەبايعا باراتىن كۇرە جولدىڭ بويىندا تۇر. مۇندا شامامەن 200-گە تارتا ەسكەرتكىش بار. بولاشاقتا جول جيەگىندە اسپان استى مۋزەيىن اشۋعا بولادى» دەيدى ارحەولوگتار.

«بۇل ەسكەرتكىشتەردىڭ ءبىر عاجابى، بۇل جەردە ەرتە قولا ءداۋىرىنىڭ جەرلەۋ ەسكەرتكىشتەرى، قونىستارى، تاستاعى پەتروگليفتەردىڭ بارلىعىن تاۋىپ تىزىمگە الىپ، ءتولقۇجاتتارىن جاساۋدامىز. بولاشاقتا بۇل ەسكەرتكىشتى زەرتتەيتىن بولسا، وسىدان 35 عاسىر بۇرىنعى تاريحي جادىگەرلەر اشىلادى دەپ ويلايمىن»، دەيدى ارحەولوگ ۇلان ۇمىتقاليەۆ.