ۇلت ۇستازىنىڭ جيەنى

نۇر-سۇلتان. قازاقپارات - ۇلت ۇستازى احمەت بايتۇرسىن ۇلىنىڭ جيەنى ماناش وتەگەن قىزى قىزىلوردا قالاسىندا تۇرادى.

بۇگىندە توقساننىڭ تورىنە اياق باسقان اجە احمەت بايتۇرسىن ۇلىنىڭ نەمەرە قارىنداسى ۇلجان قاناپيا قىزىنىڭ تۇڭعىشى.

سانالى عۇمىرىن وسكەلەڭ ۇرپاقتىڭ تاربيەسىنە ارناعان ماناش اجەنىڭ اناسى ۇلجان جۇبايى وتەگەن يسمايل ۇلى مەن 1930 -جىلدار شاماسىندا سىر بويىنا قونىس اۋدارادى. وتەگەن اقساقالمەن احمەت بايتۇرسىن ۇلى وتە جاقىن ارالاسقان، ءتىپتى تۋعان ىنىسىندەي كورگەن ەكەن. ومبى قالاسىندا ەكەۋى بىرگە وقىعان. ۇلت ۇستازى سوڭعى قامالار ساتىندە وتەگەنگە «قارىنداسىم ساعان امانات» دەپ تاپسىرعان كورىنەدى. سودان كەيىن ۇلجانمەن باس قوسىپتى.

ماناش اجە وتكەن كەزەڭنەن ەستە قالعان وقيعانى وسىلايشا ەسكە الادى. ماناش اجەنىڭ وتباسىنىڭ سىر وڭىرىنە قونىس اۋدارۋى دا ۇلت زيالىسىنىڭ قاتال تاعدىرىمەن تىعىز بايلانىستى بولسا كەرەك. ءبىر كۇنى احمەت بايتۇرسىن ۇلى وتەگەن اقساقالعا حات جازىپ، بولشيەۆيكتەردەن قۋدالاۋ بولىپ جاتقانىن جەتكىزەدى. سول سەبەپتى سىر وڭىرىنە قونىس اۋدارۋىن سۇرايدى. سوعان وراي ءبىر تۇندە جاياۋلاتىپ جولعا شىعىپ، سىر بويىنا كەلىپ قونىستانعان ەكەن.

«سىر وڭىرىنە قونىستانعاننان كەيىن كوپكە دەيىن قينالىپپىز. سول زاماننىڭ تالابىنا سايكەس ءوزىمىزدىڭ احمەتتىڭ تۋىسى ەكەنىمىزدى ايتا الماي، اتا- انام ىشتەن تىنىپ جۇرۋگە ءماجبۇر بولىپتى. سونداي قيىن- قىستاۋ كەزەڭدە بىزگە ءاردايىم قولداۋ تانىتقان سىر بويىنداعى اعايىنعا العىسىمىز شەكسىز. بەرتىن كەلە، بۇل ءوڭىردىڭ تۇرمىسىنا دا ءسىڭىسىپ كەتتىك. ال ۇلت ۇستازىنىڭ تۋىسى ەكەنىمىزدى حالىق بەرتىن كەلە ءبىلدى»، - دەپ ماناش اجە ءومىر جولدارىن تەبىرەنىسپەن باياندادى.

ماناش اجە احمەت بايتۇرسىن ۇلىن 10 جاسىندا كورگەنىن ەسىنە الدى. سول ۋاقىت تا احمەت ءوزى تۇرىپ جاتقان اۋىلعا كەلىپ-كەتىپتى. اۋىل ونىڭ كەلگەنىن ايتىپ، شۋلاپ جاتقاندا ناعاشىسىنىڭ اربامەن كەلىپ، ءبىر اقساقالدىڭ ۇيىنە تۇسكەنىن ءوز كوزىمەن كورگەن. سول ۇيدەن جەڭگەلەرى شىعىپ، قاڭىلتىردان تاتتىلەردى تاراتقانى دا ءالى كۇنگە ەسىندە.

سىر وڭىرىندە كىندىك قانى تامىپ، بالالىق داۋرەنىن وتكىزگەن ماناش اجەنىڭ اۋلەتى بۇگىندە ءبىر قاۋىم ەلگە اينالىپ وتىر. ءوزى يۋ. گاگارين اتىنداعى مەكتەپ- ينتەرناتتا ۇستازدىق قىزمەت ەتىپ، ءدال وسى ءبىلىم وشاعىنان قۇرمەتتى زەينەتكەرلىككە شىققان. سانالى عۇمىرىن ۇرپاق تاربيەسىنە ارناعان ماناش اجە كۇمىس القا يەگەرى، ءارى تىل ارداگەرى. اكەسى وتەگەن يسمايل ۇلى 1972 -جىلى باقيلىق بولسا، اناسى ۇلجان قاناپيا قىزى 1996 -جىلى ومىردەن ءوتىپتى.

ەلدىڭ قۇرمەتىنە بولەنىپ جۇرگەن ماناش اجە ءتۇرلى جيىن، شارالاردا توردەن ورىن الىپ، حالقى سۇيگەن قايراتكەر اعاسىنىڭ ءومىر جولىنان سىر شەرتۋدەن استە جالىققان ەمەس. بيىلعى كوكتەمدە قىزىلوردا قالاسىنا قاراستى اقجارما اۋىلدىق وكرۋگى، بايمۇرات باتىر اۋىلىندا احمەت بايتۇرسىن ۇلىنىڭ 150 -جىلدىعىنا وراي وتكەن شاراعا ارنايى قاتىسىپ، وسكەلەڭ ۇرپاقتى ۇلت زيالىسىنىڭ ءومىر تاريحىمەن سۋسىنداتقان. اجەمىزگە بۇل جيىندا ۇلكەن قۇرمەت كورسەتىلدى.

ۇلت ۇستازىنىڭ جيەنى ماناش اجەنىڭ ومىردەن كورگەنى مەن كوڭىلگە تۇيگەنى كوپ. ءاردايىم ءوزىنىڭ ۇلت ۇستازىنىڭ تۋىسى ەكەنىن ماقتانىشپەن ايتىپ وتىرادى.

ەرباقىت جالعاسبايەۆ،

قىزىلوردا وبلىسى

«ايقىن گازەتى»