الەم باقىلاعان رەيس: ا ق ش پەن قىتاي سوعىس الدىندا تۇر ما؟

نۇر-سۇلتان. قازاقپارات - كەشە تۇندە بۇكىل دۇنيەجۇزى ءبىر ۇشاقتىڭ قايدا جانە قاشان قوناتىنىن كوز الماي باقىلاپ وتىردى.

ءبىز ا ق ش وكىلدەرى پالاتاسىنىڭ سپيكەرى نەنسي پەلوسي مىنگەن ۇشاق تۋرالى ايتىپ وتىرمىز. رەيستى بۇكىل الەمنەن 2,92 ميلليون ادام باقىلاعان ەكەن. بۇل رەيس قىتاي مەن ا ق ش اراسىنداعى سوعىسقا سەبەپ بولۋى مۇمكىن ەكەنىن كەشە جازعانبىز.

Massaget.kz ءتىلشىسى بۇل رەيس قونعاننان كەيىن قىتاي مەن ا ق ش رەاكتسياسى قانداي بولعانىن باياندايدى.

پەلوسي مىنگەن ۇشاق تايۆان اۋەجايىنا قوندى

CTI TV مالىمەتىنشە، نەنسي پەلوسي تايۆانعا كەلىپ، تايبەيدەگى سۋنشان اۋە بازاسىنىڭ اۋەجايىندا ۇشاق باسپالداعىمەن ءتۇستى.

پەلوسي قىزعىلت كوستيۋم كيگەن، ونىڭ بەتىندە مەديتسينالىق قورعانىش ماسكا بار. ونى جەرگىلىكتى شەنەۋنىكتەر قارسى الدى.

تايۆاندىق ب ا ق حابارىنا قاراعاندا، پەلوسي 3- تامىزعا دەيىن تايبەيدە قالۋى مۇمكىن. ونىڭ دەلەگاتسياسى ءۇشىن بەس جۇلدىزدى Grand Hyatt قوناق ءۇيىنىڭ نومىرىنە تاپسىرىس بەرىلگەن.

«رەيستى بۇكىل الەمنەن 2,92 ميلليون ادام باقىلاعان»

اۋەكەمەلەرىنىڭ جاعدايىن ناقتى ۋاقىت رەجيمىندە باقىلاۋعا مۇمكىندىك بەرەتىن Flightradar24 سەرۆيسىنىڭ مالىمەتىنشە، كۋالا-لۋمپۋردان تايبەيگە دەيىنگى جەتى ساعات ىشىندە رەيستى 2,92 ميلليون ادام باقىلاعان.

SPAR19 رەيسى كۋالا-لۋمپۋردان ۇشىپ شىققاننان باستاپ Flightradar24-تە بەلسەندى رەيستەر ىشىندە ەڭ كوپ قاداعالانعان رەيس بولدى.

تايبەيگە قونعان كەزدە SPAR19-دى بۇكىل الەم بويىنشا 708000 نان اسا ادام باقىلاپ وتىرعان، بۇل Flightradar24 تاريحىنداعى ەڭ كوپ باقىلانعان تىكەلەي رەيس بولدى.

بۇل ساپارعا قىتايدىڭ رەاكتسياسى قانداي بولدى؟

RT مالىمەتىنە قاراعاندا، قىتاي نەنسي پەلوسيدىڭ تايۆانعا ساپارىنا قاتاڭ نارازىلىق ءبىلدىردى. بەيجىڭ ۆاشينگتوننىڭ شەشىمىن ايىپتاعان.

«الەمدە ءبىر عانا قىتاي بار، تايۆان - قىتاي اۋماعىنىڭ اجىراماس بولىگى، ال قىتاي حالىق رەسپۋبليكاسىنىڭ ۇكىمەتى بۇكىل قىتايدى بىلدىرەتىن جالعىز زاڭدى ۇكىمەت سانالادى»، - دەدى قىتاي سىرتقى ىستەر مينيسترلىگىنىڭ وكىلدەرى.

بەيجىڭ پەلوسيدىڭ تايبەيگە ساپارى «ءبىر تۇتاس قىتاي» قاعيداسى مەن قىتاي-ا ق ش بىرلەسكەن ءۇش كومميۋنيكەسىنىڭ ەرەجەلەرىن ورەسكەل بۇزۋ ەكەنىن اتاپ ءوتتى.

«بۇل قىتاي - ا ق ش قارىم-قاتىناسىنىڭ ساياسي نەگىزىنە ەلەۋلى اسەر ەتەدى جانە قىتايدىڭ ەگەمەندىگى مەن اۋماقتىق تۇتاستىعىنا قول سۇعۋ بولىپ سانالادى»، - دەدى قىتايلىق س ءى م وكىلدەرى.

سونداي-اق، قىتايدىڭ ا ق ش- تاعى ەلشىسى تسين گان CNN ارناسىندا نەنسي پەلوسيدىڭ تايۆانعا ساپارىنا قىتايدىڭ جاۋابى كۇشتى بولاتىنىن ايتتى.

«ءبىز ەگەمەندىگىمىز بەن اۋماقتىق تۇتاستىعىمىزعا جاۋاپ بەرۋ جانە قورعاۋ ءۇشىن بارلىق مۇمكىن شارانى قولدانامىز، ءبىزدىڭ جاۋابىمىز وتە بەرىك، كۇشتى جانە قۋاتتى بولادى»، - دەدى ول.

گان ا ق ش- تىڭ جوعارى ەشەلونىنىڭ تايۆانعا ساپارى ايماقتاعى شيەلەنىستى كۇشەيتەتىنىن اتاپ ءوتتى.

قىتاي تايۆاننىڭ التى اۋدانىنا اسكەر جينادى

Global Times مالىمەتىنشە، قىتايدىڭ حالىق-ازاتتىق ارمياسى 4-7- تامىز ارالىعىندا تايۆانداعى التى اۋداندا اسكەري جاتتىعۋلار وتكىزەدى.

«قىتاي حالىق-ازاتتىق ارمياسى تايۆانداعى التى اۋداندا بەيسەنبىدەن جەكسەنبىگە دەيىن ماڭىزدى اسكەري جاتتىعۋلار مەن وقۋ ءىس-شارالارىن، سونىڭ ىشىندە اتىس جاتتىعۋلارىن وتكىزەدى»، - دەلىنگەن حابارلامادا.

RT اقپاراتىنا سۇيەنسەك، كەشە تايۆان اۋە قورعانىسىنىڭ ايماعىنا قىتاي ارمياسىنىڭ 21 ۇشاعى كىرگەن. ودان بولەك، قىتاي ساۋدا مينيسترلىگىنىڭ حابارىنا قاراعاندا، قىتاي 3- تامىزدان باستاپ تايۆانعا قۇم ەكسپورتىن توقتاتتى. بۇل شارا «قولدانىستاعى زاڭدار مەن ەرەجەلەرگە سايكەس ەنگىزىلگەن».

پەلوسيدىڭ ءوزى نە دەدى؟

RT ارناسىنىڭ مالىمەتىنشە، نەنسي پەلوسي تايۆانعا كەلگەننەن كەيىن جازباشا مالىمدەمە جاسادى. وندا ارالعا ساپارى «تايۆان دەموكراتياسىن» قولداۋداعى «امەريكانىڭ ادالدىعى» ەكەنىن ايتتى.

پەلوسيدىڭ باسپا ءسوز قىزمەتى وكىلى ساپار ونىڭ تايۆانعا 25 جىلداعى العاشقى رەسمي ساپارى ەكەنىن ايتتى.

«كونگرەسس دەلەگاتسياسىنىڭ تايۆانعا ساپارى قارقىندى دامىپ كەلە جاتقان تايۆان دەموكراتياسىن قولداۋداعى امەريكانىڭ ۇمتىلىسىن كورسەتەدى»، - دەلىنگەن حابارلامادا.

سونىمەن قاتار، مالىمدەمەدە بۇل ساپار «ا ق ش- تىڭ ۇزاق جىل بويى جۇرگىزگەن ساياساتىنا قايشى كەلمەيتىنى» جانە «ا ق ش - قىتاي كومميۋنيكەسىنە» سايكەس كەلەتىنى ايتىلعان.

پەلوسي تايۆانعا نەگە باردى؟

Deutsche Welle مالىمەتىنشە، ا ق ش وكىلدەر پالاتاسىنىڭ سپيكەرى تايبەيدە شەنەۋنىكتەرمەن كەلىسسوز جۇرگىزىپ جاتىر.

پەلوسي جوعارى لاۋازىمدى زاڭ شىعارۋشىلارمەن كەزدەسۋدەن كەيىن تايبەيدەگى تساي ينۆەن ارالىنىڭ اكىمشىلىك باسشىسىمەن كەزدەستى.

Reuters مالىمەتىنشە، پەلوسي تايۆان پارلامەنتىندە سويلەگەن سوزىندە ا ق ش- تىڭ چيپ تۋرالى زاڭ جوباسى چيپ ونەركاسىبىندەگى ا ق ش- تايۆان ىنتىماقتاستىعىنا جاقسى مۇمكىندىك بولاتىنىن ايتتى. سونىمەن قاتار، پەلوسي تايۆانمەن پارلامەنتتىك الماسۋدى كەڭەيتكىسى كەلەتىنىن ايتتى.

«تايۆان تاريحى - بوستاندىقتى سۇيەتىن بارلىق ادام ءۇشىن شابىت. قازىر امەريكانىڭ تايۆانمەن ىنتىماقتاستىعى بۇرىنعىدان دا ماڭىزدى جانە بۇگىنگى ۇندەۋىمىز سول»، - دەدى پەلوسي تايۆان پارلامەنتىنە.

سونىمەن قاتار، پەلوسي گونكونگ پەن تايۆاننىڭ دەموكراتيانى قولدايتىن بەلسەندىلەرىمەن كەزدەسۋدى جوسپارلاپ وتىر. كەلىسسوزدەر ورتاق مۇددەلەردى جانە ەركىن جانە اشىق ءۇندى-تىنىق مۇحيتى ايماعىن ىلگەرىلەتۋگە ارنالادى، دەلىنگەن حابارلامادا.

ب ۇ ۇ پىكىرى قانداي؟

ب ۇ ۇ باس حاتشىسى ستەفان ديۋجارريك ب ۇ ۇ «ءبىرتۇتاس قىتاي» ساياساتىن قولدايتىنىن ايتتى.

«مەن بۇل ماسەلە بويىنشا ب ۇ ۇ ساياساتى ب ۇ ۇ باس اسسامبلەياسىنىڭ «ءبىرتۇتاس قىتاي» تۋرالى 1971-جىلعى 2758- قارارىن باسشىلىققا الاتىنىن عانا ايتا الامىن»، - دەدى ديۋجارريك.

ال 2758- قارارىندا بەيجىڭدى قىتايدىڭ ب ۇ ۇ- داعى جالعىز زاڭدى وكىلى ەكەنى جازىلعان.