ەلىمىزدە نان باعاسىنىڭ ءوسۋى نەمەن بايلانىستى

نۇر-سۇلتان. قازاقپارات - قازاقستان استىق وندىرۋشىلەر وداعىنىڭ ءتوراعاسى نۇرلان وسپانوۆ ەلىمىزدە نان باعاسىنا قاتىستى پىكىر ءبىلدىردى، دەپ حابارلايدى قازاقپارات ءتىلشىسى.

«نان باعاسىنىڭ ارزانداۋى نەمەسە قىمباتتاۋى بيداي باعاسىنا بايلانىستى. ەگەر بىزدە بيدايدىڭ تونناسى 120 مىڭ تەڭگە بولسا، وندا نان 120 تەڭگە تۇرادى. شوتتاردى جەڭىلدەتۋ ءۇشىن مەملەكەتتىك ورگاندار دا وسىلاي ەسەپتەيدى. سوندىقتان ءبىز بولجاعانداي بيداي باعاسى تومەندەيتىن بولسا، تيىسىنشە ەلىمىزدە نان باعاسىنىڭ وسپەۋىنە بارلىق نەگىز بار»، - دەدى نۇرلان وسپانوۆ ەلوردادا وتكەن دوڭگەلەك ۇستەل بارىسىندا تىلشىلەردىڭ سۇراعىنا جاۋاپ بەرە وتىرىپ.

دەگەنمەن، وداق باسشىسىنىڭ ايتۋىنشا، بيداي مەن نان قۇنى اراسىندا تىكەلەي كوررەلياتسيا جوق.

«بيداي باعاسى نان ءوندىرۋ كەزىندەگى جالپى شىعىننىڭ شامامەن %30 ىن قۇرايدى. ودان بولەك، نان وندىرۋدە ەلەكتر ەنەرگياسى، جانار- جاعارماي، تاعى باسقا شىعىندار بار. سوندىقتان تىكەلەي كوررەلياتسيا بولماۋى مۇمكىن. ءبىراق نان باعاسى، تەوريا بويىنشا، تومەندەۋى مۇمكىن. سول سياقتى نان باعاسىنىڭ تومەندەۋى باسقا دا ازىق- تۇلىك (ەت، جۇمىرتقا، كۇنباعىس مايى) باعاسىنىڭ ارزانداۋىنا ىقپال ەتەدى. بۇل مۇمكىن نارسە»، - دەيدى ول.

بۇعان دەيىن حابارلاعانىمىزداي قازاقستان استىق وندىرۋشىلەر وداعى يمپورتقا تىيىم سالۋدى ۇسىنىپ وتىر . سونداي-اق، وتاندىق بيداي باعاسىنا اسەر ەتەتىن بىرنەشە فاكتور بەلگىلى بولدى.

اۆتور داۋلەت ىزتىلەۋ