شىعىسقازاقستاندىق بالۋان ەركىن كۇرەستەن الەم چەمپيوناتىنىڭ فينالىندا جەڭىسكە جەتتى

وسكەمەن. قازاقپارات - شىعىسقازاقستاندىق بالۋان دارىن اسكەربەك يتاليادا وتكەن ەركىن كۇرەستەن الەم چەمپيوناتىنىڭ فينالىندا امەريكالىق قارسىلاسىنان باسىم ءتۇستى، دەپ حابارلايدى قازاقپارات ءتىلشىسى.

شىعىس قازاقستان وبلىسىنىڭ تۋماسى دارىن اسكەربەك يتاليانىڭ ريم قالاسىندا وتكەن 17 جاسقا دەيىنگى جاسوسپىرىمدەر اراسىنداعى الەم چەمپيوناتىندا 55 كەلى سالماقتا ەل نامىسىن قورعادى. بالۋان حۋسانبوي ۋسمونوۆتى (وزبەكستان)، ارەنا سەروبياندى (ارمەنيا) جەڭىپ، جارتىلاي فينالدا نەمىس ياننيس رەبگولتسپەن شىقتى.

قارسىلاسىنان باسىم تۇسكەن ول فينالدا امەريكالىق دجەكسەن پاتريك فوررەستتى ءتىز بۇكتىرىپ، الەم چەمپيونى اتاندى.

ايتا كەتەيىك، ەركىن كۇرەستەن قازاقستان قورجىنىنا سوڭعى التىن 2013 -جىلى بۇيىرعان بولاتىن.