الاكولگە باراتىن تۋريستەر سانىنىڭ ازايۋىنا نە سەبەپ

نۇر-سۇلتان. قازاقپارات - الاكول جاعالاۋىنا دەمالۋعا بارعىسى كەلەتىندەر كوپ، ءبىراق جول ناشار.

دەمالىس ورتالىقتارىنىڭ يەلەرى وسىنداي شاعىمداردى «اتامەكەن» ۇلتتىق كاسىپكەرلەر پالاتاسىنا ءجيى جولدايدى، دەپ حابارلايدى قازاقپارات ءتىلشىسى.

ايتۋلارىنشا، ساپالى جولدىڭ جوقتىعىنا بايلانىستى الاكولگە جەكە كولىكپەن بارۋدىڭ ماشاقاتى كوپ. ال ءۇرجار جانە ءۇشارال اۋەجايى جوندەلىپ جاتىر. تيىسىنشە، رەيستەر توقتاتىلعانى بەلگىلى. ء«ىنجۋ» جانە «Arasan Alakol» دەمالىس بازالارىنىڭ يەسى ەلەنا اسىلبەكوۆانىڭ پايىمىنشا، سىن كوتەرمەيتىن تاسجولداردىڭ كەسىرىنەن تۋريستەر سانى ازايۋى مۇمكىن.

«ءۇرجار جانە ءۇشارال اۋەجايلارى جوندەۋگە بايلانىستى جابىق تۇر. باستاپقى جوسپار بويىنشا، الماتى- وسكەمەن تاس جولىن سالۋ جۇمىستارى 2020 -جىلى اياقتالۋى ءتيىس ەدى. ءبىراق ول توقتاتىلدى. «قازاۆتوجول» كومپانياسى دەمالىس ماۋسىمىندا جول ساپاسىن قاداعالاپ وتىرۋعا ۋادە ەتكەن. الايدا، مىندەتىن ورىندامادى. مەن بىرنەشە كۇن بۇرىن الماتىعا كەلدىم. قابانباي مەن كولباي اۋىلدارىنىڭ اراسىنداعى جولدار شۇرىق- تەسىك، شاڭى شىعىپ جاتىر. وكىنىشكە قاراي، پويىزدارعا بيلەت جوق. بارلىعى الدىن الا ساتىلىپ كەتكەن»، - دەدى ەلەنا اسىلبەكوۆا.

ونىڭ ايتۋىنشا، الاكولگە ەڭ كوپ تۋريست وتكەن جىلى كەلگەن. پاندەمياعا بايلانستى شەت مەملەكەتتەرگە شىعۋعا قويىلعان شەكتەۋلەر ىشكى تۋريزمگە ەداۋىر پايدا اكەلگەن. ال بيىل تۇركيا، مىسىر، بىرىككەن اراب امىرلىكتەرى سياقتى ەلدەرگە ساياحاتتاۋ مۇمكىندىگىنىڭ بولۋى - وتاندىق دەمالىس ورىندارىنا تەرىس اسەر ەتىپ وتىر.

«الاكولدەگى دەمالىس بازالارى كوپ تۋريست بولادى دەپ كۇتكەن ۋاقىتتىڭ وزىندە ورتالىقتار 30-50 پايىزعا عانا تولىپ تۇر. تەك شىلدە ايىنىڭ ورتاسىنان باستاپ دەمالۋشىلار سانى وسە باستادى. الاكولدە تۋريستەردىڭ مۇنداي از بولۋى بۇرىن- سوندى بولعان ەمەس»، - دەپ ءمالىم ەتتى ەلەنا اسىلبەكوۆا.

«اتامەكەن» ۇ ك پ بولسا، ماسەلەنىڭ شەشىمى رەتىندە كولىك جولدارىنىڭ ساپاسىن جاقسارتىپ، لوگيستيكانى دامىتۋدى ۇسىنىپ وتىر.

«پاندەميا ىشكى تۋريزمنىڭ دامۋىنا وڭ اسەر ەتتى. ءبىز قازاقستاندىقتاردىڭ بۋراباي، الاكول، اقتاۋ، تۇركىستان، باياناۋىل جانە وزگە دە ەل ىشىندەگى دەمالىس ورىندارىنا بارۋعا نيەتتى ەكەنىن بايقايمىز. ءبىراق وسى جوعارى سۇرانىسقا قاراماستان، كولىك لوگيستيكاسىندا ماسەلەلەر تۋىندايدى. ماسەلەن، ۇشاق بيلەتتەرىنىڭ قىمباتتاۋى، الاكول باعىتى بويىنشا ورىندالاتىن اۋە رەيستەرىنىڭ بولماۋى، سالىنىپ بىتپەگەن جولدار جانە پويىز بيلەتتەرىنىڭ تاپشىلىعى تۋريستەر اعىنىنا تەرىس اسەر ەتەدى»، - دەدى «اتامەكەن» ۇ ك پ باسپا ءسوز قىزمەتى قازاقپارات ءتىلشىسىنىڭ ساۋالىنا وراي.

ازىرگە الاكولگە ۇشاقپەن بارۋ مۇمكىندىگى بولماي تۇر. ويتكەنى، ءۇشارال جانە ءۇرجار اۋەجايلارىنداعى جوندەۋ جۇمىستارىن مەردىگەر ۇيىمدار ۋاقتىلى ورىنداماي، ولاردى اشۋ مەرزىمى كەيىنگە شەگەرىلدى.

وسىعان بايلانىستى يندۋستريا جانە ينفراقۇرىلىمدىق دامۋ ءمينيسترى قايىربەك وسكەنبايەۆ جەرگىلىكتى اتقارۋشى ورگاندارعا قوس اۋەجايدى قالىپقا كەلتىرۋ جۇمىستارىن تەز ارادا اياقتاۋدى تاپسىردى. ال ءۇشارال جانە ءۇرجار اۋەجايلارىنا سۋبسيديالانعان رەيستەردى ۇيىمداستىرۋ جۇمىستارى مەرزىمىنەن بۇرىن اياقتالىپ قويعان ول ءۇشىن قاجەتتى قارجى ءبولىنىپ، رەيستەردى ورىندايتىن اۆياكومپانيالار دا انىقتالعان. اۋەجايلار قىزمەتى ىسكە قوسىلعان جاعدايدا ورىندالاتىن رەيستەر: ءۇشارال- الماتى جانە ءۇشارال- نۇر-سۇلتان باعىتىندا جولاۋشىلاردى «SCAT» اۆياكومپانياسى تاسىمالدايدى.

رەيستەر جازعى ماۋسىمدا اپتاسىنا 14 رەت، ال قالعان مەزگىلدەردە اپتاسىنا 7 رەت ورىندالادى. بيلەت قۇنى - 15-16 مىڭ تەڭگە بولادى. سونداي-اق ءۇشارال- تالدىقورعان باعىتى بويىنشا جولاۋشىلاردى «جەتىسۋ» اۆياكومپانياسى تاسىمالدايدى. ول جازدا اپتاسىنا 28، ال قالعان مەزگىلدەردە 14 رەيس ورىندايدى. بۇل باعىتقا «L-410» ۇشاقتارى ۇشادى. بيلەت قۇنى - 8 مىڭ تەڭگە. ءۇرجار- الماتى جانە ءۇرجار- نۇر-سۇلتان باعىتىندا «يۋجنوە نەبو» اۆياكومپانياسى قىزمەت كورسەتەتىن بولادى.

اتالعان باعىتتارعا رەيستەردى «ان-24» ۇشاعى ورىندايدى. رەيستەر جازعى ماۋسىمدا اپتاسىنا 10 رەت، ال قالعان مەزگىلدەردە اپتاسىنا 5 رەت جاسالادى.

بيلەت قۇنى - 14-16 مىڭ تەڭگە بولادى. ءۇشارال جانە ءۇرجار اۋەجايلارىن ۋاقىتشا جابۋ كەزەڭىندە الاكول جاعالاۋىنا جەتۋ جولى رەتىندە قوسىمشا پويىزدار قاراستىرىلعان.

الاكول ايماعىنا دەيىن مىنا باعىتتاعى پويىزدار جۇرەدى:

الماتى- الاكول:

№221/222 «الماتى-2 - دوستىق»، اپتاسىنا 3 رەت؛

№ 255/256 «الماتى-2 - دوستىق»، اپتاسىنا 3 رەت؛

№ 211/212 «الماتى-2 - دوستىق»، اپتاسىنا 2 رەت؛

453/454 «الماتى-2 - دوستىق»، جاز مەزگىلىندە اپتاسىنا 3 رەت؛

نۇر-سۇلتان- الاكول:

№ 258/257 «نۇر-سۇلتان - دوستىق»، جاز مەزگىلىندە اپتاسىنا 2 رەت؛

№ 54/53 «نۇر-سۇلتان - دوستىق»، اپتاسىنا 2 رەت؛

№ 121/122 «نۇر- سۇلتان - سەمەي» پويىزىنا 6 تىركەمەلى ۆاگون جالعانادى. ول جازعى ماۋسىمدا كۇنارا قاتىنايدى.

نۇر-سۇلتان- سەمەي:

457/458 «سەمەي - دوستىق»، جاز مەزگىلىندە كۇنارا؛

459/460 «وسكەمەن-دوستىق»، جاز مەزگىلىندە كۇنارا.