شەتەلدە تىركەلگەن اۆتولار جول-كولىك وقيعاسىنا ءجيى ۇشىرايدى

اقتوبە. قازاقپارات - اقتوبە وبلىستىق پد باستىعى اباي ءجۇسىپوۆتىڭ ايتۋىنشا، قازىرگى كەزدە شەتەلدىك ءنومىرى بار كولىك تىزگىندەگەندەر ەرەجەنى ءجيى بۇزادى.

كوبىنىڭ تەحنيكالىق جاعدايى ناشار، دەپ حابارلايدى قازاقپارات ءتىلشىسى.

«جىل باسىنان بەرى شەتەلدىك ەسەپتە تۇرعان كولىك جۇرگىزۋشىلەرى 50 جول- كولىك وقيعاسىنا تاپ بولدى. 18 ادام قازا تاپتى. 90-نان استام ادام اۋرۋحاناعا جەتكىزىلدى. ماسەلەن، قوستاناي- قارابۇتاق جولىنداعى ايتەكە بي اۋدانىنىڭ ماڭىندا جول اپاتى بولدى. ارمەنيادان اكەلىنگەن جەڭىل كولىك پەن گازەل سوقتىعىسىپ، ءۇش ادام كوز جۇمدى. ونىڭ بىرەۋىنىڭ جاسى بىردە. تاعى ءبىر وقيعا تۋرالى ايتقىم كەلەدى. 18-شىلدە كۇنى سامارا- شىمكەنت تاس جولىندا جۇرگىزۋشى رۋلگە يە بولا الماي، اۋدارىلىپ قالدى»، - دەدى وبلىستىق پ د باستىعى اباي ءجۇسىپوۆ.

جالپى، جازعى دەمالىس ماۋسىمىندا وڭىردە جول-كولىك وقيعاسى جيىلەپ كەتتى. اتاپ ايتقاندا، جىل باسىنان بەرى 300-دەن استام جول- كولىك وقيعاسى تىركەلىپ، 400-دەن استام ادام اۋرۋحاناعا جاتقىزىلدى، 54 ادام قازا تاپتى.

«جازدىڭ ەكى ايىندا 120 كولىك وقيعاسى تىركەلىپ، 25 ادام كوز جۇمدى. وسى جول اپاتتارىندا 6 بالا كوز جۇمدى. سەبەبى بەلگىلى. جۇرگىزۋشىلەر جول قوزعالىسى ەرەجەسىن ساقتامايدى. قارسى جولاققا شىعىپ كەتەتىندەرى كوپ. وسى ەرەجەنى بۇزعانى ءۇشىن 7 ادام كوز جۇمعان. جىلدامدىقتى اسىراتىنداردىڭ كەسىرىنەن 37 ادام مەرت بولدى. تۇرعىنداردان قوزعالىس ەرەجەسىن ساقتاۋدى سۇرايمىن. جولدا شارشاعان جاعدايدا ۋاقتىلى دەمالىپ العان دۇرىس. الىس ساپارعا شىققان ادام كولىكتىڭ تەحنيكالىق جاعدايىن ءبىلىپ الۋى كەرەك»، - دەدى وبلىستىق پ د باستىعى اباي ءجۇسىپوۆ.