جۇرت الدىندا وققا ۇشقان ايگىلى ساياساتكەرلەر

نۇر-سۇلتان. قازاقپارات - جاقىندا جاپونيانىڭ بۇرىنعى پرەمەر-ءمينيسترى، الەمدەگى تانىمال ساياساتكەرلەردىڭ ءبىرى سيندزو ابەنى جۇرتتىڭ كوزىنشە بىتىرا مىلتىقپەن اتىپ كەتكەن ەدى.

وقيعا بۇكىلالەمدىك شۋ مەن ينتريگا تۋعىزدى. ساياساتكەر وق تيگەندە-اق ءجانتاسىلىم بولعانعا ۇقسايدى، اۋرۋحاناعا اپارعانىمەن پايدا بولمادى.

جالپى مۇنداي جاعاۇستاتار جاعداي الەمدە تالاي رەت بولعان. ساياساتكەرگە قاستاندىق جاساۋدى كەز كەلگەن قاسكويدىڭ ويلايتىنى راس. ەندەشە قاي ساياساتكەرلەردى جۇرتتىڭ كوزىنشە، ەلدىڭ الدىندا اتىپ كەتىپ ەدى، ونداي قايعىلى جاعدايلار كىمنىڭ باسىنان ءوتتى، سوعان توقتالايىق.

دجون فيتسدجەرالد كەننەدي

جۇرتتىڭ كوزىنشە قاستاندىق جاسالعان اتاقتى ادامداردىڭ تىزىمىندە كەننەدي ءبىرىنشى ورىندا تۇر. بىلدەي ءبىر مەملەكەتتىڭ، الەمدەگى ەڭ ءىرى دەرجاۆا – ا ق ش- تىڭ پرەزيدەنتىن ەلدىڭ كوزىندە ءجانتاسىلىم ەتۋ - ناعىز قيانات.

كەننەدي – ا ق ش- تىڭ 35-پرەزيدەنتى. الاڭدا جۇرت الدىندا كولىكپەن كەتىپ بارا جاتىپ وق ءتيىپ، قايتىس بولادى. 1963-جىلى 24- قاراشادا.

ساياساتكەرگە قاستاندىق جاساعان ادام سول كۇنى-اق ۇستالدى. پرەزيدەنتكە وق اتقان اتاقتى كيللەردىڭ اتى - لي حارۆي وسۆالد. ءبىراق ونىڭ دا عۇمىرى قىسقا بولدى. قاماۋدا جاتقان كەزدە قاستاندىق جاسالادى. قىلمىس سول كۇيى جابىق قالادى. كۋاگەر جوق، جالعىز كيللەر ءولىپ كەتتى. وسۆالدتىڭ ءوزى «پرەزيدەنتتىڭ ساياساتى مەن كوزقاراسى ماعان ۇنامادى، سول سەبەپتى قاستاندىققا باردىم» دەپ جاۋاپ بەرگەن تەرگەۋدە. وسىمەن بولدى.

الەمدەگى ەڭ اتاقتى قىلمىستىق ءىس وسىمەن جابۋلى قازان جابۋلى كۇيىندە قالادى. ءالى كۇنگە دەيىن بۇل ءىستىڭ اينالاسىندا اڭىز بەن اقيقات ارالاسىپ، شاتاسىپ ءجۇر.

ينديرا گاندي

ينديرا گاندي - ءۇندىستاننىڭ العاشقى ايەل باسشىسى، پرەمەر-ءمينيسترى. وعان 1984-جىلى 31- قازاندا قاستاندىق جاسالادى. ساياساتكەردى ءجانتاسىلىم ەتكەن سينحيزم ءدىني اعىمىنىڭ وكىلدەرى كورىنەدى. ولار «پرەمەر-مينيستر سينحيزم اعىمىنىڭ عيباداتحاناسى سانالاتىن «التىن عيباداتحاناعا» اسكەري رەيد جۇرگىزىپ، تەكسەرىس جاساماق بولدى، سونىڭ الدىن الۋ ءۇشىن قاستاندىق جاسالدى» دەپ جاۋاپ بەرگەن.

گانديدىڭ ءولىمى ءۇندى حالقىنا وڭاي تيمەدى. سينحيلەردەن ءوش العىسى كەلىپ، مىڭداعان ادام قازا تاپتى.

ۋلوف پالمە

كەننەديدىڭ ءولىمى سياقتى تاعى ءبىر قۇپيا قالعان وقيعا - شۆەتسيانىڭ پرەمەر-ءمينيسترى ۋلوف پالمەنىڭ ءولىمى. شۆەد پرەمەرى ءبىرشاما بەلسەندى، الەمدىك ارەنادا ءوز ورنى بار ساياسي باسشى بولاتىن. ا ق ش- تىڭ دا، ك س ر و- نىڭ دا ساياساتىن قاتتى سىنادى. وڭتۇستىك افريكاداعى اپارتەيد رەجىمىن اسا جاقتىرماعان ساياساتكەر.

قىم-قۋىت ساياسي مالىمدەمە جاساپ ءجۇرىپ، 1984-جىلى كۇردىستان جۇمىس پارتياسىن دا لاڭكەستىك ۇيىم دەپ مويىنداپ، ونىڭ جەكە مەملەكەت بوپ قۇرىلۋىنا قارسى بولادى.

ال 1986-جىلى 28- اقپان كۇنى پالمەگە قاستاندىق جاسالادى. ستوكگولمنىڭ ءدال ورتاسىندا، جۇرت كوپ جۇرەتىن جەردە. ساياساتكەر سول كۇنى كەشكە كينوتەاترعا ايەلى جانە بالاسىن ەرتىپ بارعان، كۇزەتشىلەرىنىڭ بىردە-بىرەۋىن ەرتپەگەن. كينوتەاتردان شىققان ۋاقىتتا-اق وق اتىلادى.

ءولىم سول كۇيى قۇپيا قالدى. كىمنىڭ ولتىرگەنى بەلگىسىز. كوبى بۇعان كۇردىستان جۇمىسشىلار پارتياسىنىڭ ءىسى دەگەندى العا تارتادى. الايدا دالەل كۇڭگىرت، سۇراق كوپ.

بەنازير بحۋتتو

قاستاندىقتىڭ قۇربانىنا اينالعان تاعى ءبىر ايەل باسشى. بەنازير بحۋتتو - پاكىستاننىڭ العاشقى ايەل باسشىسى، ەلدىڭ پرەمەر-ءمينيسترى بولعان. ەكى رەت پرەمەر بوپ سايلانادى. ساياسي پانا تابۋ ءۇشىن ءتىپتى شەتەلگە دە قاشقان.

2007-جىلى پاكىستانعا قايتا ورالىپ، ساياسي پروتسەستەرگە ەتەنە ارالاسادى. سول كەزدەگى ەل پرەزيدەنتى پەرۆەز مۋشارافپەن كوپ كيكىلجىڭگە كەلەدى، ونى قاتتى سىنايدى. اسىرەسە، بەنازيردىڭ «ءدىندى مەملەكەتتىك ىسكە ارالاستىرماۋ كەرەك، زايىرلى ەل بولۋىمىز كەرەك» دەگەن پىكىرى كوپكە ۇنامادى. سول ءۇشىن ەكى رەت قاستاندىق ۇيىمداستىرىلعان ەكەن.

ەڭ العاشقىسى - 2007-جىلى بولعان جارىلىس. ساياساتكەرگە ەشتەڭە بولا قويمادى، ءبىراق جارىلىستىڭ كەسىرىنەن 130 ادام قايتىس بولىپ، 500 ادام جاراقات العان.

ەكىنشىسى - سول جىلى 27- جەلتوقساندا بولدى. ميتينگتە ەل الدىندا ءسوز سويلەپ تۇرعان بەنازيرگە مىلتىق اتىلىپ، ەكى وق كەپ كەۋدەسىنە تيەدى. ونىمەن قويماي قاسكويلەر ميتينگ ءوتىپ جاتقان الاڭدى جارىپ تا جىبەرگەن. ساياساتكەر اۋرۋحانادا ەسىن جيماي قايتىس بولدى.

تۇرعىت وزەل

تۇرىك باسشىلارىنا دا بىرنەشە رەت قاستاندىق جاسالعان ەكەن. ماسەلەن، تۇركيانىڭ بۇرىنعى پرەزيدەنتى بولەنت ەجدەبيتكە ەكى رەت، العاش رەت 1976-جىلى ا ق ش- قا بارعان ءىس-ساپارىندا، 1977-جىلى 29- مامىردا يزمير اۋەجايىندا وق اتىلعان. ەكەۋىن دە گرەكتەر ىستەگەنگە ۇقسايدى.

ەجدەبيت ەكەۋىنەن دە امان قالعان.

قاستاندىق جاسالعان تاعى ءبىر تۇرىك باسشىسى - تۇرعىت وزەل. 1988-جىلى ماۋسىمدا انكارادا تريبۋنالدا ءسوز سويلەپ تۇرعان جەرىنەن وق اتىلادى. شامالى جاراقات الادى، ءبىراق ءسوزىن توقتاتپاعان دەسەدى. وق اتقان ادامى ۇستالعان.

massaget.kz