شۆەدتەر نە سەبەپتى ەڭ باقىتتى حالىق؟

نۇر-سۇلتان. قازاقپارات - شۆەتسيا ەڭ باقىتتى ەلدەر رەيتينگىندە كوشباسشى ورىننان تۇسكەن ەمەس.

اتاقتى شۆەد تەپە-تەڭدىگىنىڭ فيلوسوفياسى - لاگوم جايلى ەستىدىڭىز بە؟ لاگوم - ءار نارسەنىڭ شاماسىن ءبىلۋ فيلوسوفياسى. لاگوم «قانشا قاجەت بولسا، سونشا»، «ءدال» دەپ اۋدارىلادى. بۇل باقىتتى ءومىر ءسۇرۋدىڭ جانە قورشاعان ورتامەن ۇيلەسىمدە بولۋدىڭ كىلتى. شۆەتسيادا اتا-انالار بالالارىن جاستايىنان وسى فيلوسوفياعا ۇيرەتەدى، سەبەبى ونىڭ پرينتسيپتەرى ادامداردى مەيىرىمدى جانە اينالاداعىلارعا مۇقيات بولۋعا باۋليدى.

شاماسىن ءبىلۋ پرينتسيپتەرى

بارلىق نارسەدە تەپە-تەڭدىك ساقتاۋ. تەپە-تەڭدىك بولۋ ءۇشىن ءار نارسەنىڭ شاماسىن ءبىلۋ كەرەك. ءونىمدى جۇمىس ىستەڭىز، ءبىراق جەكە ومىرىڭىزگە زيانى تيمەسىن. بارىنە ۇلگەرىڭىز، ءبىراق وزىڭىزگە ءبىر بوس كۇن قالدىرۋدى ۇمىتپاڭىز. ادەمى كيىنىڭىز، ءبىراق گاردەروبتى كيىممەن تولتىرماڭىز. تەپە-تەڭدىككە جەتۋ ءۇشىن بىردەڭەدەن باس تارتۋدىڭ قاجەتى جوق - تەك قانشا قاجەت، سونشا الۋ كەرەك.

سانالى تۇتىنۋ. بىردەڭە ساتىپ الماس بۇرىن ونىڭ سىزگە قاجەتتىلىگىن باعالاڭىز. شكافتا ورىن بولماسا، شىنىمەن دە تاعى ءبىر كويلەكتىڭ كەرەگى بار ما؟ ۇيدە ىدىس تولىپ تۇرسا دا، كەزەكتى سەرۆيزدى ساتىپ الۋدىڭ قاجەتى بار ما؟ لاگوم ستيلىندە ءومىر ءسۇرۋ ءۇش ارزان زات العانشا ءبىر ساپالىسىن الۋدى ۇسىنادى. بۇل كيىمگە، جيھازعا، تۇرمىستىق زاتتارعا دا قاتىستى ايتىلعان.

لاگوم ستيلىندەگى تاماق. كەشكى اس ۇسىناردا تاماقتى اركىمگە تارەلكەگە سالىپ ۇسىنباڭىز. تاماقتى ورتاعا قويىڭىز. اركىم وزىنە قانشا كەرەك، سونشا السىن. ءمازىردى ءبىر اپتاعا الدىن الا جوسپارلاڭىز: سول كەزدە جوسپارلانباعان ساۋدا جاسامايسىز. پايدالى ماۋسىمدىق ونىمدەر قولدانىڭىز، كوكونىستەردى قىسقا قاتىرىپ قويىڭىز. اراسىندا وزىڭىزگە دارشىن قوسىلعان بولكە نان جەۋگە رۇقسات بەرىڭىز.

لاگوم ستيلىندەگى ءۇي. سكانديناۆيالىق ينتەرەر لاگوم پرينتسيپتەرىنە ساي. ول قىزىقتى دەتالدارمەن تولتىرىلادى، ءبىراق وندا ارتىق زاتتار بولمايدى. قولدان جاسالعان زاتتار، تابيعي ماتەريالدار، ساپالى جانە كوپ قىزمەتتى جيھاز... مينيماليزم، قولايلىلىق جانە ىڭعايلىلىقتى دۇرىس ۇيلەستىرە بىلسەڭىز، تەپە-تەڭدىككە جەتەسىز. ءۇيدى لاگوم ەتۋ ءۇشىن ونى سكانديناۆيالىق ستيلدە جاساۋ مىندەتتى ەمەس. باستىسى، ءۇي سىزگە ۇناۋى كەرەك.

از نارسەدەن ءلاززات الۋ ونەرى

فيكا. بارلىق شارۋانى ىسىرىپ، ءتاتتى توقاشپەن كوفە ءىشۋ - كۇندەلىكتى كىشكەنتاي باقىتتىڭ قۇپياسى. ءتاتتى بىردەڭەمەن كوفە ىشۋگە ءۇزىلىس الۋدى شۆەتسيادا فيكا (fika) دەپ اتايدى. بۇل ادەت ءۇي جانە جۇمىس شارۋالارىنان دەمالىپ، ءوزىڭىزدى سەبەپسىز ەركەلەتۋگە، ارىپتەستەرىڭىزبەن اڭگىمەلەسۋگە جانە جاي كۇندەردى كىشكەنتاي مەرەكەگە اينالدىرۋعا كومەكتەسەدى.

دەمالۋ. بارلىعى گادجەتكە بايلانعان جانە بارلىعىنا ۇلگەرۋگە تىرىساتىن الەمدە توقتاپ، باياۋلاپ، وزىڭىزگە دەمالىس جاريالاي ءبىلۋ كەرەك. ومىردە سۇيىكتى ىستەرگە ورىن بولۋى كەرەك. شارۋالار تىزىمىنە ساياباقتا سەرۋەندەۋ، سالونعا بارۋ، ۇيىقتار الدىندا كىتاپ وقۋدى قوسىڭىز. ونسىز تەپە-تەڭدىك بولمايدى.

ەكولوگيالىق ءومىردىڭ پرينتسيپتەرى

قورشاعان ورتاعا قامقورلىق جاساۋ. الەمدى ەكولوگيالىق ەتۋ اركىمنىڭ قولىنان كەلەدى. قوقىستى سۇرىپتاۋ، زاتتاردى قايتا وڭدەۋگە تاپسىرۋ، تۇتىنۋدى ازايتۋ، زاتتاردى لاقتىرماي، جوندەۋ - لاگوم بويىنشا ءومىر ءسۇرۋدىڭ قاراپايىم ارەكەتتەرى.

اينالانى كوگالداندىرۋ. شۆەدتەر ءۇشىن تابيعاتتىڭ ماڭىزى زور. ول - تەپە-تەڭدىك، دەنساۋلىق، جايلىلىق پەن جان تىنىشتىعىنىڭ كوزى. سوندىقتان شۆەد ۇيلەرىندە تابيعات ماتەريالدارى وتە كوپ: اعاش ەدەن، ءجۇن جامىلعى، قوي تەرىسى جانە ارينە، گۇلدەر.

ساندىق دەتوكس. شۆەدتەر گادجەتتەرگە الاڭداماي اڭگىمەلەسۋ ادەبىن ساقتايدى. ولار وتباسىلىق كەشتى جۇمىستان كەلگەن جەدەل حات ءۇزىپ تاستايدى دەپ قورىقپايدى. دوستارىڭىزبەن كەزدەسۋ نەمەسە وتباسىلىق كەش كەزىندە ۇيالى تەلەفونعا الاڭداماۋعا تىرىسىڭىز. ال ەڭبەكتىك دەمالىس كەزىندە حابارلامالاردى ءوشىرىپ تاستاپ، الەۋمەتتىك جەلىلەرگە مۇلدەم كىرمەگەن دۇرىس.

massaget.kz