دۇنيەجۇزىلىك شاحمات وليمپياداسىنىڭ اشىلۋىندا نەگە قازاقستان تۋى بولمادى

نۇر-سۇلتان. قازاقپارات - ءۇندىستاندا 44-دۇنيەجۇزىلىك شاحمات وليمپياداسى باستالدى. ايتۋلى دودانىڭ اشىلۋ سالتاناتىندا ەلىمىزدىڭ تۋى بولمادى.

وسىعان بايلانىستى ق ر شاحمات فەدەراتسياسىنىڭ باسپا ءسوز قىزمەتى تۇسىنىك بەردى، دەپ حابارلايدى قازاقپارات ءتىلشىسى.

«بۇعان دەيىنگى وليمپيادالاردا سپورتشىلاردىڭ شەرۋى بولعان جوق. ادەتتە، مەملەكەتتىك تۋ وليمپيادانىڭ جابىلۋ سالتاناتىندا جەڭىمپازداردى ماراپاتتاۋ ساتىندە قاجەت. بيىل ۇيىمداستىرۋشىلار تۋ الىپ شىعۋدى ۇيعارعان، ءبىراق دەلەگاتسيانى ءتيىستى دەڭگەيدە حاباردار ەتپەدى»، - دەگەن جاۋاپ بەرىلدى فەدەراتسيادان.

سونداي-اق، شاحمات وليمپياداسىنىڭ اشىلۋ سالتاناتىندا قازاقستاننان باسقا دا ەلدەردىڭ تۋسىز شىققانى ايتىلعان.

«وليمپياداعا قاتىسۋشى ەلدەردىڭ جارتىسىنان كوبىنە مەملەكەتتىك تۋ تۋرالى ەسكەرتىلمەگەن. ال، كەيبىر مەملەكەت وكىلدەرى شەرۋگە مۇلدەم قاتىسپادى»، - دەيدى ۆەدومستۆودان.

ايتا كەتسەك، 44- دۇنيەجۇزىلىك شاحمات وليمپياداسىنىڭ اشىلۋ سالتاناتىندا قازاقستان رەسپۋبليكاسىن حالىقارالىق گروسسمەيستەر جانسايا ابدىمالىك جانە حالىقارالىق شەبەر ارىستانبەك ورازايەۆ تانىستىردى.

ال، اتالعان دودادا ەلىمىزدىڭ نامىسىن ەرلەر مەن ايەلدەر قۇراما كومانداسى قورعايدى.

ەرلەر قۇراما كومانداسى:

رينات جۇمابايەۆ

مۇرتاس قاجىعاليەۆ

ارىستانبەك ورازايەۆ

قازىبەك نوگەربەك

الىشەر سۇلەيمانوۆ

ايەلدەر قۇراما كومانداسى:

جانسايا ابدىمالىك

ءبيبىسارا اساۋبايەۆا

گۇلىسحان ناحبايەۆا

كسەنيا بالابايەۆا

نازەركە نۇرعالي