اتا- اناڭا نە ىستەسەڭ، الدىڭا سول كەلەدى

نۇر-سۇلتان. قازاقپارات - الەمنىڭ ءبىر بۇرىشىندا وتە قارت كىسى ءومىر ءسۇرىپتى. ەل- جۇرت ونى عۇمىرىنىڭ كوپ بولىگىن بالا- شاعاسىنىڭ قامىنا ارناپ، ۇلىن ۇياعا، قىزىن قياعا قوندىرعان ەڭبەكقور اقساقال دەسەدى.

كوزى كورۋدەن، قۇلاعى ەستۋدەن قالعان اقساقالدىڭ بۋىندارى مەن تىزەسى قالتىرايدى ەكەن. بۋىندارىنىڭ السىزدىگى سونشالىقتى، قاسىقتى دا دۇرىس ۇستاي المايتىن جانە تاماقتاناردا داستارقاندى ءجيى بىلعايتىن بولعان. ال كەيدە اۋزىنا بارعان اس بايقاۋسىزدا ءتۇسىپ قالادى ەكەن. ۇلى مەن كەلىنى قارياعا جيىركەنىشپەن قاراپ، اۋىر سوزدەرمەن كەك الاتىن بولادى.

ۋاقىت وتە كەلە ونى پەشتىڭ تۇبىنە وتىرعىزىپ، قالعان- قۇتقان تاماقتى الدىنا قويۋدى شىعارادى. ەسكى تاباقشانى ۇستاعان اقساقالدىڭ جانارى جاسقا تولىپ، جۇرەگى قارس ايىرىلاتىن. كۇندەردىڭ كۇنىندە تاماقتانىپ وتىرعان كىسىنىڭ قولدارى دىرىلدەپ، قولىنداعى تاباق ءتۇسىپ كەتەدى. تاباق سىندى دا قالدى. جاس كەلىن اۋزىنا كەلگەن بالاعات ءسوزدى ايتا باستايدى. قاريا ۇندەمەدى، جاي عانا تەرەڭ كۇرسىندى دە، ورنىنا جايعاستى. كەلىنى مەن ۇلى اقىلداسا كەلە اعاش تاباق ساتىپ اكەلەدى. قاريا پەشتىڭ تۇبىندە اعاش تاباقتى ۇستاعان كۇيى قالىپ قويدى...

وسىلايشا، كۇندەر ءوتىپ جاتتى. وتاعاسى مەن ايەلى داستارقان باسىندا وتىرعاندا، بولمەگە اعاش كەسىندىسىن ۇستاعان 4 جاسار بالا كىرىپ كەلەدى. اكەسى: - بالام، مۇنى قايتپەكسىڭ؟ - دەدى. سوندا ۇلى اتاسىنا قاراپ: - مەن بۇل اعاشتان تاباق جاسايمىن. سەندەر انام ەكەۋىڭ دە قارتاياسىڭدار عوي، - دەپ جاۋاپ بەرگەن ەكەن...

Massaget.kz