قىزمەتتىك كولىگىمەن بالاسىن مەكتەپكە تاسىعان سوت ءتوراعاسى ەسكەرتۋمەن قۇتىلدى
ول قىزمەتتىك كولىگىن جۇمىستان تىس پايدالانىپ، بالالارىن مەكتەپكە اپارعانى انىقتالعان، دەپ حابارلايدى قازاقپارات ءتىلشىسى.
قاراعاندى وبلىسىنىڭ قىلمىستىق ىستەر جونىندەگى ارنايى سوتىنىڭ ءتوراعاسى بەكزات شالعىمبايەۆتىڭ قىزمەتتىك كولىگىمەن بالالارىن مەكتەپكە تاسىمالداعانى تۋرالى بەينەجازبا وتكەن جىلدىڭ جەلتوقسان ايىندا الەۋمەتتىك جەلىلەردە جاريالانعان بولاتىن.
كۋاگەرلەر قىزمەتتىك كولىكتەن سۋديانىڭ بالاسى شىعىپ بارا جاتقانىن، ونى مەكتەپكە جۇرگىزۋشىسى الىپ كەلگەنىن ءتۇسىرىپ العان بولاتىن. تەكسەرۋ قورىتىندىسى بويىنشا قىزمەتتىك كولىكتى جەكە ماقساتتا پايدالانۋ بولىگىندە بۇزۋشىلىقتار انىقتالعانى بەلگىلى بولدى. ماتەريالدار جوعارى سوت كەڭەسى جانىنداعى سوت القاسىنا بەرىلدى. تەكسەرىس قورىتىندىسى بويىنشا بەكزات شالعىمبايەۆ تارتىپتىك جاۋاپكەرشىلىككە تارتىلدى.
«قازاقستاننىڭ جوعارى سوت كەڭەسى جانىنداعى سوت القاسىنىڭ شەشىمىمەن بەكزات شالعىمبايەۆ سۋديا ادەبى كودەكسىنىڭ نورمالارىن بۇزعانى ءۇشىن ەسكەرتۋ تۇرىندە تارتىپتىك جاۋاپكەرشىلىككە تارتىلدى»، - دەپ مالىمدەدى قاراعاندى وبلىستىق سوتىنىڭ باسپا ءسوز قىزمەتى.
اۆتور اگاتا مۋحامەدجانوۆا
