شەتەل ازاماتتارىنىڭ قازاقستانعا كەلۋى باسپانا نارىعىنا قالاي اسەر ەتتى

نۇر-سۇلتان. قازاقپارات - شەتەل ازاماتتارىنىڭ قازاقستانعا كەلۋى باسپانانى جالعا الۋ قۇنىنا اسەر ەتتى.

بۇل تۋرالى بىرىككەن ريەلتورلار قاۋىمداستىعى پرەزيدەنتىنىڭ كەڭەسشىسى نينا لۋكيانەنكو ايتتى، دەپ حابارلايدى قازاقپارات ءتىلشىسى.

«شەتەل ازاماتتارىنىڭ ەلىمىزگە كەلۋى جىلجىمايتىن مۇلىك قۇنىنا اسەر ەتە قويمادى. دەگەنمەن ولاردىڭ ەلىمىزگە كەلۋى باسپانانى جالعا الۋ قۇنىنا ىقپال ەتتى»، - دەدى ن. لۋكيانەنكو قازاقپارات اگەنتتىگىنە بەرگەن جاۋابىندا.

سونىمەن قاتار ساراپشى قازاقستانعا كەلگەن شەتەل ازاماتتارىنىڭ بارلىعى بىردەي جىلجىمايتىن مۇلىكتى ساتىپ الا بەرمەيتىنىن اتاپ ءوتتى. بۇدان بۇرىن حابارلانعانداي، باسپانا نارىعىندا مۇلىكتى ساتىپ الۋ- ساتۋ مامىلەلەرىنىڭ سانى ازايدى.

قازاقستاندا باسپانا باعاسىنىڭ تۇراقتانىپ كەلە جاتقانى بايقالىپ وتىر.

ن. لۋكيانەنكونىڭ ايتۋىنشا، جىل باسىنان بەرى باعانىڭ ءوسىمى ءبىر ايدا 2,1-5,5 پايىزدى قۇراسا، مامىر- شىلدەدە باسپانا قۇنى ونىڭ جاڭا نەمەسە ەسكى بولۋىنا قاراي قالىپتاستى. بۇل تۇرعىدا باسپانانىڭ تۇرىنە قاراي 0,4 پايىزدان 1,7 پايىزعا دەيىن ءوستى.