تەلەفون قۋاتتاعىشتى توك كوزىندە قالدىرۋعا بولا ما؟

نۇر-سۇلتان. قازاقپارات - ادەتتە تەلەفوندى قۋاتتاعاننان كەيىن ادامدار قۋاتتاعىش قۇرىلعىسىن توك كوزىنەن اجىراتۋدى ۇمىتىپ كەتەدى.

اتا-انالار قۋاتتاعىشتى توك كوزىنەن اجىراتپاي تاستاۋعا بولمايتىنىن، بۇل قىسقا تۇيىقتالۋعا نەمەسە ءتىپتى ورتكە اكەلۋى مۇمكىن ەكەنىن ايتىپ وتىرادى.

بۇگىن ءبىز بۇل جاعداي تۋرالى بارلىق ميفتەردى ساراپتاپ كورەمىز جانە تەلەفون قۋاتتاۋ قۇرىلعىسىن توك كوزىندە قالدىرۋ شىنىمەن قاۋىپتى مە سونى انىقتايمىز.

ارينە، قۋاتتاعىشتى توك كوزىندە قالدىرۋعا بولادى. ميلليونداعان ادامدار مۇنى جەكە تاجىريبەدە سىناپ كوردى. ءبىراق بۇل ارەكەتتىڭ اينالاسىندا كوپتەگەن ميفتەر مەن كۇلكىلى كەڭەستەر تۋعانى سونشا، ءسىز ولاردىڭ قايسىسى شىندىققا سايكەس كەلەتىنىن بىلمەي قالاسىز.

ەلەكتر ەنەرگياسىن تۇتىنۋ

تەلەفوندى قۋاتتاۋ قۇرىلعىسى شىنىمەن دە تەلەفونسىز دا ەلەكتر قۋاتىن تۇتىنادى. ءبىراق مۇنداي كەزدە قۇرىلعى ەنەرگيانىڭ وتە از مولشەرىن شىعىندايدى. ەگەر ءسىز ءبىر جىل بويى قۋاتتاعىشتى توك كوزىنەن وشىرمەسەڭىز، وندا شىعىن 1/3 كيلوۆاتت بولادى. ءبىراق شامادان تىس، ءتىپتى ەلەۋسىز بولسا دا، توكقا تولەگىڭىز كەلمەسە، قۋاتتاعىشتى ودان اجىراتىڭىز.

پايدالانۋ مەرزىمى

تاعى ءبىر تانىمال ميف. كوپتەگەن ادامدار قۋاتتاعىش توك كوزىندە نەعۇرلىم ۇزاق تۇرسا ونىڭ پايدالانۋ مەرزىمى سوعۇرلىم قىسقا بولادى دەيدى. بۇل جەردە ءبىراز شىندىق بار ەكەنىن مويىنداعان ءجون. قۋاتتاعىشتىڭ قىزمەت ەتۋ مەرزىمى ورتاشا ەسەپپەن 50000 ساعاتتى قۇرايدى. بۇل شامامەن 6 جىل.

ءبىراق ورتاشا ەسەپپەن ءبىر قۋاتتاعىشتى 5 جىل پايدالانۋ مۇمكىن ەمەس. كوپتەگەن ادامدار وسى ۋاقىت ىشىندە بىرنەشە تەلەفوندى اۋىستىرادى.

ءورت قاۋپى

ۇيدەگى توك كوزى ەسكى نەمەسە اقاۋى بار بولسا نەمەسە قىسقا تۇيىقتالۋدان جانە شامادان تىس جۇكتەمەلەردەن اۆتوماتتى قورعانىس بولماسا، وندا ءورت قاۋپى بار. بۇل فاكتورلار ءورتتىڭ پايدا بولۋىنا اسەر ەتۋى مۇمكىن.

ءبىراق بۇل ماسەلە قۋاتتاۋدا ەمەس - تىزبەكتىڭ كەز كەلگەن بولىگىندە قىسقا تۇيىقتالۋ پايدا بولۋى مۇمكىن. قاۋىپتى بولدىرماۋ ءۇشىن قوسىلعان قۇرىلعىلاردى، ءتىپتى تەلەديدار مەن توڭازىتقىشتى دا قاراۋسىز قالدىرماڭىز.

قۋاتتاعىشتى توك كوزىنەن اجىراتۋدىڭ تاعى ءبىر جاقسى سەبەبى - نايزاعاي. ءبىراق بۇل تەك تەلەفون قۋاتتاعىشىنا قاتىستى ەمەس. بارلىق ەلەكترون تەحنيكالارىنا قاتىستى.

بالالار مەن ءۇي جانۋارلارى

بالالى ۇيدە قۋاتتاعىشتى توك كوزىندە قالدىرماۋ كەرەك. سەبەبى، بالا كەز كەلگەن نارسەگە قىزىققىش كەلەدى جانە جاڭا زاتتاردى اۋزىنا سالىپ، ءدامىن كورگەندى ۇناتادى. مۇنداي كەزدە توك كوزىندە تۇرعان قۋاتتاعىش بالا ءۇشىن تىم قاۋىپتى. بۇل ۇيدە ءيت-مىسىق ۇستايتىندارعا دا قاتىستى. سەبەبى، ولار كابەلدى شايناعاندى ​​جاقسى كورەدى.

massaget.kz