مايمىل شەشەگى تىركەلگەن مەملەكەتتەر ىشىندە ا ق ش كوش باستاپ تۇر
اۋرۋ جۇقتىرعان امەريكالىقتاردىڭ سانى يسپانياداعى 3100 جاعداي مەن گەرمانياداعى 2352 ادامنان ارتىق.
الەم بويىنشا بۇل اۋرۋ 75 ەلدە 18100 گە جۋىق ادامنان انىقتالدى. سونىڭ ىشىندە 17800 دەن استام ادام بۇعان دەيىن اتالعان اۋرۋ تىركەلىپ كورمەگەن ەلدەردە جۇقتىرعان. دەنساۋلىق ساقتاۋ سالاسىنىڭ ماماندارى مايمىل شەشەگىن جۇقتىرعاندار سانى ا ق ش- تا رەسمي تىركەلگەن جاعدايلاردان الدەقايدا كوپ ەكەنىن ايتىپ وتىر.
سوندىقتان ۇكىمەت تەستىلەۋ مەن ەپيدەميولوگيالىق قاداعالاۋ شارالارىن كۇشەيتىپ جاتىر.
اۋرۋلاردى باقىلاۋ جانە الدىن الۋ ورتالىعىنىڭ ديرەكتورى روشەل ۆالەنسكيدىڭ ايتۋىنشا، ادەتتە مايمىل شەشەگىنىڭ بەلگىلەرى ۆيرۋس جۇقتىرعاننان كەيىن ءۇش اپتا ىشىندە كورىنەدى. سوندىقتان شىلدە مەن تامىزدا اۋرۋ جۇقتىرعاندار سانى كوبەيۋى مۇمكىن.
تەحاستاعى بالالار اۋرۋحاناسى ارنايى وقشاۋلاۋ بولىمشەسىنىڭ مەديتسينالىق ديرەكتورى دوكتور ەمي اررينگتون ادام ليفت باتىرماسىن باسىپ نەمەسە ساۋدا ورتالىعىندا بىرەۋدىڭ قاسىنان وتكەن كەزدە مايمىل شەشەگىن جۇقتىرا المايتىنىن ايتتى.
ۆيرۋس ۇزاق ۋاقىت تىعىز قاتىناستا بولعان كەزدە عانا جۇعادى - اۋرۋ جۇقتىرعان ادامنىڭ تەرىسىندەگى ينفەكتسيالىق وشاققا ءتيىپ كەتسە، اۋرۋ ادامنىڭ كيىمى، توسەك-ورنىمەن جاناسقان ساتتە بەرىلۋى ىقتيمال.
