ءۇشىنشى ەلدەردەن اكەلىنگەن اۆتوكولىكتەردى كەدەندىك تازارتۋدان سوڭ عانا ايداۋعا بولادى

نۇر- سۇلتان. قازاقپارات - سوڭعى كەزدەرى قازاقستان اۋماعىنا شەت ەل ازاماتتارىنىڭ جەكە پايدالانۋىنا ارنالعان كولىك قۇرالدارىن ۋاقىتشا الىپ كەلۋ جاعدايلارى جيىلەپ كەتكەن، دەپ حابارلايدى قازاقپارات مەملەكەتتىك كىرىستەر كوميتەتىنە سىلتەمە جاساپ.

بۇل كولىكتەر نەگىزىنەن گرۋزيا مەن ازەربايجان ازاماتتارىنىڭ اتىنا تىركەلگەن. سودان سوڭ مۇنداي كولىك قۇرالدارى ءبىزدىڭ ەلدىڭ ازاماتتارىنىڭ «يەلىگىنە» بەرىلەدى. «ەسكەرەتىن جايت، ەۋرازيالىق ەكونوميكالىق وداقتىڭ (ە ا ە و) كەدەن اۋماعىنا ءۇشىنشى ەلدەردەن ۋاقىتشا اكەلىنگەن كولىك قۇرالدارى شەتەلدىك تاۋارلار بولىپ تابىلادى جانە كەدەندىك باقىلاۋدا بولادى (ءۇشىنشى ەلدەر – ە ا ە و قۇرامىنا كىرمەيتىن ەلدەر). وسىعان وراي، ۋاقىتشا اكەلىنگەن كولىك قۇرالدارىن ساتىپ الۋعا جانە قازاقستان اۋماعىندا پايدالانۋعا تەك كەدەندىك تازارتۋدان سوڭ جانە سايكەسىنشە تيەسىلى كەدەندىك الىمدار مەن سالىقتاردى تولەگەن سوڭ عانا قولدانۋعا بولاتىنىن ەسكەرتەمىز»، - دەپ جازدى ۆەدومستۆودان.

جەكە پايدالانۋعا ارنالعان شەتەلدىك كولىك قۇرالدارىن، شەتەل ازاماتتارى ءوز كولىك قۇرالدارىن اكەلگەن سوڭ، قازاقستاننىڭ اۋماعىنان بەلگىلى ءبىر ۋاقىتتان كەيىن كەتىپ قالاتىنى بايقالۋدا. ياعني، ە ا ە و اۋماعىنا اتالعان اۆتوكولىك قۇرالدارى اكەلىنگەندە، قازاقستان ازاماتىنا بەرۋ ماقساتىندا كەلگەن دەپ پايىمدالۋدا.

«ۋاقىتشا اكەلۋ مەرزىمى اياقتالعاننان كەيىن (1 جىل) اۆتوكولىك قۇرالدارى ە ا ە و اۋماعىنان شىعىپ كەتۋى قاجەت. ەگەر شىعىپ كەتپەسە، ە ا ە و- تىڭ قولدانىستاعى زاڭناماسىنا سايكەس ءتيىستى شارالار قولدانىلادى»، - دەلىنگەن حابارلامادا.

كوميتەت پوليتسيا دەپارتامەنتتەرىمەن بىرلەسە وتىرىپ، رەيدتتىك ءىس- شارالار جۇرگىزۋدى ۇيىمداستىرعان، قولدانىستاعى زاڭناماعا سايكەس ونداي كولىكتەر ۇستالادى. قازىرگى تاڭدا 116 اۆتوكولىك قۇرالى ۇستالىپ، ۋاقىتشا ساقتاۋ قويمالارىنا ورنالاستىرىلعان. بۇل باعىتتاعى جۇمىستار جالعاسۋدا. وسىعان بايلانىستى، مەملەكەتتىك كىرىستەر كوميتەتى قازاقستان ازاماتتارىنان جەكە پايدالانۋعا ارنالعان اۆتوكولىكتى ساتىپ العاندا، ەلىمىزدىڭ زاڭناماسىن ساقتاۋدى سۇرايدى. الايدا ءسىز ساتىپ العالى جاتقان اۆتوكولىگىڭىزدىڭ شىعۋ تاريحى نەمەسە زاڭدىلىعى كۇدىك تۋعىزاتىن بولسا، وندا قازاقستاندا كەدەندىك تازارتۋدان وتكەنى جانە تيەسىلى كەدەندىك الىمدار مەن سالىقتار تولەگەنى تۋرالى اقپاراتتى مەملەكەتتىك كىرىستەر ورگاندارىنان بىلۋگە بولادى.

ول ءۇشىن كوميتەتكە (87172717724) نەمەسە تۇرعىلىقتى جەردەگى مەملەكەتتىك كىرىستەر دەپارتامەنتىنە، سونىمەن قاتار ق ر ق م م ك ك بايلانىس ورتالىعىنا حابارلاسۋعا بولادى.