ساياسات نۇربەك عىلىم مينيسترلىگى قالاي قۇرىلعانىن ايتتى
ونىڭ ايتۋىنشا، ءبىلىم جانە عىلىم مينيسترلىكتەرىن ءبولۋ ماسەلەسى قوعامدا 2-3 -جىلداي تالقىلانعان.
«حالىقارالىق تاجىريبەدە دە مۇنىڭ بىرنەشە ۇلگىسى بار. ماسەلەن، كورشىلەس وزبەكستاندا مەكتەپكە دەيىنگى، ءبىلىم جانە جوعارى ءبىلىم بويىنشا ءۇش مينيسترلىك بار. 2018 -جىلى رەسەي فەدەراتسياسى دا جوعارى ءبىلىم جانە اعارتۋ مينيسترلىگى دەپ ەكىگە ءبولدى. سوندىقتان، پرەزيدەنت بۇكىل ۇسىنىستاردى، ساراپشىلاردىڭ پىكىرلەرىن تىڭداپ، وسىنداي شەشىم قابىلدادى. وتكەن ايدىڭ باسىندا ءوزىمدى شاقىرىپ، وسى عىلىم جانە جوعارى ءبىلىم مينيسترلىگى قۇرىلىپ جاتقانىن، مەنىڭ جوعارى بىلىمگە قاتىستى ۇسىنىستارىم ۇناپ جۇرگەنىن ايتتى. وزدەرىڭىزگە بەلگىلى، مەن پرەزيدەنت جانىنداعى ۇلتتىق كەڭەستىڭ مۇشەسى بولدىم، وندا 2-3 رەت كەزدەسىپ، كادر دايارلاۋ، جوعارى ءبىلىم، قولدانبالى عىلىم جونىندە پىكىرلەرىمدى ايتقان ەدىم. مەن بىردەن كەلىستىم، ويتكەنى ءقازىر پرەزيدەنتتىڭ «جاڭا قازاقستان» تۇجىرىمداماسىن قولداۋىمىز كەرەك»، - دەدى ساياسات نۇربەك ق ر پرەزيدەنتى تەلەراديوكەشەنىنىڭ «3 سۇراق» باعدارلاماسىندا.
سونىمەن بىرگە، ساياسات نۇربەك پرەزيدەنتپەن كەزدەسۋ قالاي وتكەنىن ەسكە الدى.
«كەزدەسۋ وتە جاقسى بولدى، پرەزيدەنت كوتەرىڭكى كوڭىل-كۇيدە بولدى. ءبىراق جاۋاپكەرشىلىك تە وتە اۋىر ەكەنىن ايتتى. ەسىمدە قالعان نەگىزگى وي - «ساياسات، ءسىز «جاڭا قازاقستاننىڭ» جاڭا ءمينيسترى بولىپ تاعايىندالىپ وتىرسىز. سوندىقتان جاۋاپكەرشىلىك ءسىزدىڭ يىعىڭىزدا بولادى، جۇيەلى پروبلەمالار جينالىپ قالدى، عىلىمنىڭ قازىرگى مارتەبەسى، عالىمنىڭ قوعامداعى ورنى، لاۋازىمى، اتاعى مۇلدەم ءتۇسىپ قالدى. سوندىقتان، عىلىمنىڭ، عالىمنىڭ، پروفەسسوردىڭ قوعامداعى مارتەبەسىن كوتەرۋگە باسا ءمان بەرىڭىز» دەپ تاپسىرما بەردى. جانە دە كادر دايارلاۋ ماسەلەسى - «جاڭا قازاقستاننىڭ» نەگىزگى ىرگەتاسى، نەگىزگى باسىم باعىتى بولعانىن ايتىپ كەتتى. سوندىقتان مەن سول جاۋاپكەرشىلىكتى ءتۇسىنىپ، العىسىمدى ايتىپ، پرەزيدەنتتىڭ قولداۋىن سۇرادىم. ويتكەنى، شىنىندا دا قازىر جاڭا جۇيەلى رەفورمالاردى باستاۋ دا وڭاي بولماس»، - دەيدى عىلىم ءمينيسترى.
ونىڭ ايتۋىنشا، ەسكى ءبىلىم جانە عىلىم مينيسترلىگىنەن 99 ادام عىلىم مينيسترلىگىنە اۋىسادى.
«ارينە بۇل جەتكىلىكسىز، سوندىقتان پرەمەر- مينيستر مەن ەكونوميكا مينيسترلىگىنىڭ قولداۋىمەن 310 شتاتتى الىپ جاتىرمىز. بۇل جۇمىس جالعاسادى، وسى جىلدىڭ سوڭىنا دەيىن 200-250 ادامعا جەتكىزەمىز (...) مينيستر بولعاننان كەيىن ءومىر قاتتى وزگەردى. كۇندە دەمالىسسىز جۇمىس ىستەيمىز. جاڭا مينيسترلىك نەمەسە جاڭا مەكەمە قۇرۋدىڭ ءۇش فورماتى بار. ءبىرىنشى فورماتى - دايىن مينيسترلىككە، دايىن اپپاراتقا كەلۋ جانە جۇمىستى ءارى قاراي قالعاستىرۋ. ەكىنشى فورمات - مۇلدەم جاڭا مەكەمە قۇرۋ جانە ەڭ قيىنى ءۇشىنشى فورماتى ەكەن - جاڭا مينيسترلىكتى قۇرۋ جانە ەسكىسىنەن ءبولىنىپ كەتۋ»، - دەدى س. نۇربەك.
ەسكە سالا كەتسەك، 11-ماۋسىم كۇنى پارلامەنت ءماجىلىسىنىڭ دەپۋتاتى بولعان ساياسات نۇربەك ق ر عىلىم جانە جوعارى ءبىلىم ءمينيسترى لاۋازىمىنا تاعايىندالدى.
