گاز باعاسى تاعى وسەمە؟

نۇر-سۇلتان. قازاقپارات - قازاقستاندا سۇيىتىلعان مۇناي گازى بولشەك ساۋدا باعالارى كوتەرىلمەيدى، دەپ حابارلايدى قازاقپارات ەنەرگەتيكا مينيسترلىگىنە سىلتەمە جاساپ.

1- شىلدەدە ق ر ەنەرگەتيكا مينيسترلىگىنىڭ سۇيىتىلعان مۇناي گازىنىڭ شەكتى كوتەرمە ساۋدا باعاسىن 1 تونناسىنا 33600 تەڭگە دەڭگەيىندە بەكىتۋ تۋرالى بۇيرىعى كۇشىنە ەنەدى.

بۇل 1 ليترگە شاققاندا 19,7 تەڭگەنى قۇرايدى، جىل باسىنان باستاپ كوتەرمە ساۋدا باعاسى - 1 توننا ءۇشىن 28000 تەڭگەنى (16 ت گ./ ليتر) قۇرادى.

«سۇيىتىلعان گازعا كوتەرمە ساۋدا باعالارىن %20 عا ارتتىرۋ (3,7 ت گ./ ل.) ءبىرىنشى كەزەكتە زاۋىتتاردىڭ سۇيىتىلعان گاز ءوندىرىسىن قولداۋعا باعىتتالعان.

بۇل شارا سۇيىتىلعان گازدى وندىرۋشىلەر مەن وتكىزۋشىلەر اراسىندا كىرىستەردى ءىشىنارا ءادىل ءبولۋدى قامتاماسىز ەتۋگە جانە زاۋىتتاردى سۇيىتىلعان گاز وندىرۋگە ىنتالاندىرۋعا مۇمكىندىك بەرەدى، ويتكەنى اعىمداعى كوتەرمە ساۋدا باعاسى 1 توننا ءۇشىن 28000 تەڭگە بولعان كەزدە پايدانىڭ نەگىزگى ۇلەسى سۇيىتىلعان گازدى بولشەك ساۋدادا وتكىزۋمەن اينالىساتىن نارىق سۋبەكتىلەرىندە قالادى، ال ءوندىرۋشى زاۋىتتار شىعىنمەن جۇمىس ىستەيدى.

بۇل رەتتە قازىرگى ۋاقىتتا ق ر باسەكەلەستىكتى قورعاۋ جانە دامىتۋ اگەنتتىگى شەكتى بولشەك ساۋدا باعالارىن مەملەكەتتىك رەتتەۋ مەرزىمدەرىن ۇزارتۋ بويىنشا جۇمىستاردى جۇرگىزىپ جاتقانىن، وعان سايكەس سوڭعى تۇتىنۋشىلار ءۇشىن سۇيىتىلعان مۇناي گازى بولشەك ساۋدا باعالارى كوتەرىلمەيدى جانە بۇرىنعى دەڭگەيدە قالاتىنىن حابارلايمىز»، - دەلىنگەن مينيسترلىك حابارلاماسىندا.