فرانسۋزدار نەسىمەن ەرەكشە؟
ولار مادەنيەتتىڭ قاتارىنا نانىم-سەنىم، ءداستۇردى دە قوسادى. سوندىقتان بولا، كوپتەگەن تۋريست فرانسيانى ءداستۇرىن سىيلاعان جاپونيامەن تەڭەستىرىپ جاتادى. راسىندا دا، باتىس ەۋروپاداعى ءداستۇرىن ساقتاپ كەلە جاتقان تەك وسى - فرانسيا ەلى.
فرانسيانىڭ تۇرعىنىڭ باستى قۇندىلىعى - قۇرمەت كورسەتۋ مەن جىميۋ. ولار سەزىمتال ءارى ەموتسياعا بەرىلگىش كەلەدى. ويىن، ءسوزىن تەز ءارى ءدال جەتكىزۋ ءۇشىن قولدارىن ءجيى سەرمەيدى.
امانداسۋ كەزىندە فرانسۋزدار مىندەتتى تۇردە قول الىسىپ سالەمدەسەدى. كينولاردان بايقاساڭىزدار، فرانسۋزدار جاقىندارىن كورگەندە ەكى بەتىنەن دە ءسۇيىپ امانداسادى، ال الىس تانىستارىن كورگەندە تەك ءبىر بەتىنەن ءسۇيىپ سالەمدەسەدى. سىرتتاي باعا بەرگەن ادام دا بۇلاردىڭ اراسىنداعى بايلانىستى وسى امالداردان بىلە الادى.
ولار بەيتانىس ادامدارمەن «ءسىز» مارتەبەسىندە سويلەسەدى. سونىمەن قاتار، «مەسە»، «مادمۋازەل» نە بولماسا «مادام» دەگەن سىپايى قاراتپا سوزدەرمەن تىلدەسەدى.
فرانسۋزدار ويدان تىڭ دۇنيە جاساۋدان الدىنا جان سالمايدى. اسىرەسە، تاعام ازىرلەۋدەن جانە كيىم ۇلگىسىن جاساۋدان. مىسالى، ينگرەديەنت سايكەستىگىنە قاراماي-اق، قولىندا بار زاتپەن تاماق جاساي بەرەدى، كەز كەلگەن فرانسۋزدىڭ توڭازىتقىشىندا ىرىمشىكتىڭ ءتۇر-ءتۇرى (ونىڭ ىشىندە بالقىتىلعان، موتسارەللا، پارمەزان، چەددەر، پيكورينو، ريكوتتا، قىزىل شاراپقا ارنالعان تالەدجيو، گريۋيەر اتالاتىن ىرىمشىكتەر)، كوك شوپتەر، شاراپ پەن كىلەگەي، ءزايتۇن مايى، تارتىلعان ەت ساقتالادى. وسى اتالعان تاعامداردى دامىنە قاراي ارالاستىرىپ، ادەمى دۇنيە جاساپ شىعادى.
ءسان الەمىنەن دە فرانسۋزداردىڭ ىلگەرى جۇرەتىنىنىڭ باستى سەبەبى، ولار تاۋەكەلگە بارۋدان قورىقپايدى. «مىنا بەينە (وبراز) دۇرىس ەمەس-اۋ» دەيتىن كەزدەر وتە سيرەك كەزدەسەدى. قىسقا بالاقتى شالبار مەن ۇزىن جەيدەنى سايكەستەندىرە الاتىندار دا وسى - فرانسۋزدار.
تاجىريبە جاساۋدان، بەرىك شەشىم جاساۋدان دا قورىقپايتىن ولار ءسان پوديۋمىندا ەركىن ءجۇرىپ كەلەدى. وسىنداي ەرەكشەلىكتەرىنە قاراپ، فرانسۋزداردىڭ جاڭالىقتى ۇناتاتىندارىن بايقاۋعا بولادى.
