قاڭتاردا ۇستالعان تالدىقورعان تۇرعىنىن ازاپتاپ ءولتىردى دەگەن كۇدىكپەن ەكى پوليسەي قامالدى
بۇل تۋرالى ق ر باس پروكۋراتۋراسى 1-قىزمەت باسشىسىنىڭ ورىنباسارى ەلدوس قيلىمجانوۆ ايتتى، دەپ حابارلايدى قازاقپارات ءتىلشىسى.
ايتا كەتەيىك، الماس مۇقاشيەۆ قاڭتار وقيعاسىنان كەيىن ۇستالعان. مارقۇمنىڭ جاقىندارى تەرگەۋ كەزىندە تىيىم سالىنعان ادىستەر قولدانىلعانىن، كوپتەگەن دەنە جاراقاتى سالىنىپ، سالدارىنان دەنى ساۋ ادامنىڭ كوز جۇمعانىن مالىمدەگەن بولاتىن.
«ناقتى وسى كەزەڭدە، ياعني 6-8-قاڭتار ارالىعىندا ازاماتتاردىڭ قازا بولۋ فاكتىلەرى تىركەلدى. ونىڭ بارلىعى بويىنشا تەرگەۋ ءجۇرىپ جاتىر. مۇقاشيەۆتىڭ ولىمىنە اكەپ سوققان ۇرىپ- سوعۋ فاكتىسى بويىنشا تەرگەۋ ىسىمەن ارنايى پروكۋرورلار اينالىسىپ جاتىر. وسى ءىس بويىنشا سوتتىڭ سانكتسياسىمەن قۇقىق قورعاۋ ورگاندارىنىڭ 2 قىزمەتكەرى قاماۋعا الىندى»، - دەدى ە. قيلىمجانوۆ ورتالىق كوممۋنيكاتسيالار قىزمەتىندە.
بۇدان بۇرىن حابارلانعانداي، قاڭتار وقيعاسى بويىنشا تەرگەۋ ورگاندارىنىڭ قاراماعىندا 5041 قىلمىستىق ءىس بار. سونىمەن قاتار ە. قيلىمجانوۆ قاڭتار وقيعاسى كەزىندە الماتى وبلىسىندا 16 ادام قازا بولعانىن ناقتىلادى.
