الەمدەگى ميى ەڭ ۇلكەن حالىق - قازاقتار بولىپ شىقتى

نۇر- سۇلتان. قازاقپارات - تانىمال رەسەيلىك انتروپولوگ ستانيسلاۆ دروبىشيەۆسكي الەمدەگى ەڭ ۇلكەن مي قازاقتارعا ءتان ەكەنىن ايتتى.

«وسىدان 25 مىڭ جىل بۇرىن ەرلەردىڭ ميىنىڭ كولەمى 1500 گرام بولعان. ال قازىر 1400 گرامعا دەيىن ازايىپ كەتتى. ارينە، ونىڭ ءبارى ادامداردىڭ ورنالاسقان تەرريتورياسىنا دا بايلانىستى. بۇگىنگى تاڭدا ميى ەڭ ۇلكەن حالىق - قازاقتار، بۋرياتتار، موڭعولدار. 100 گرام ايىرماشىلىق اسا كوپ ەمەس، دەگەنمەن ونىڭ دا وزىندىك اسەرى بار»، - دەيدى ستانيسلاۆ دروبىشيەۆسكي.

مي كىشىرەيۋىنىڭ سەبەبى نەيرون، سيناپس، حيميا، نەيرومەدياتر تۇزىلۋىنە بايلانىستى.

ال كەي كرومانوندىقتاردىڭ ميىنىڭ ۇلكەن بولۋى گەنەتيكادان بەرىلگەن. ءبىزدىڭ ميىمىزدىڭ 100 گرام كىشى بولۋى ولاردان ءسال عانا اقىماقتاۋ بولۋىمىزعا اسەر ەتەدى. سەبەبى، كرومانوندىقتار 25 مىڭ جىل بۇرىن ءومىرىنىڭ العاشقى 10 جىلىندا وت جاعىپ، تاماق ءپىسىرىپ، اڭ اۋلاپ، جىرتقىشتاردان امان قالۋعا بەيىمدەلگەن. وسىلاي ءتىرى قالۋدىڭ جولىندا ولار تەز ويلاپ، ۇتقىر شەشىمدەر قابىلداعان. سونىڭ اسەرى ۇرپاقتارىنا دا بەرىلگەن دەپ ويلايمىن»، - دەيدى انتروپولوگ.