ساداق اتۋ ونەرى ءار قازاقتىڭ قانىندا بار - مەرگەن قىز

وسكەمەن. قازاقپارات - جاۋگەرشىلىك زاماندا ءار قازاقتىڭ اتى بەلدەۋدە، بەس قارۋى كەرەگەنىڭ باسىندا بولعان. وسى بەس قارۋدىڭ ءبىرى - ساداقتى ەرلەر عانا ەمەس، ايەلدەر دە تارتا بىلگەن.
None
None

ەجەلدە بۇل دۇشپاننان قورعانۋ مەن اڭ اۋلاۋدىڭ قۇرالى بولسا، بۇگىندە سپورتتىڭ ءبىر تۇرىنە اينالىپ وتىر. شىعىس قازاقستان وبلىسى گلۋبوكوە اۋدانىندا تۇراتىن مەرگەن قىز اجار تولەۋقانوۆا ساداقشىلار ۇيىرمەسىن اشقان. بۇل وڭىردەگى وسىنداي جالعىز ۇيىرمە. ءتالىمىن كورگەن شاكىرتتەرى بۇگىندە رەسپۋبليكالىق جارىستاردا توپ جارىپ ءجۇر.

ەكسپو- داعى ەتنواۋىلدان باستالدى

وسكەمەن قالاسىندا دۇنيەگە كەلگەن اجار تولەۋقانوۆانىڭ ساداق پەن جەبەنى جانىنا سەرىك ەتىپ كەلە جاتقانىنا 5 جىلعا جۋىق ۋاقىت بولدى. العاش رەت كوزىن سىعىرايتىپ، ادىرنادان وق ۇشىرعان ءساتى ءالى دە كوز الدىندا. بۇل ەلوردادا ەكسپو كورمەسى اۋماعىنداعى ەتنواۋىلدا بولدى.


«سول جەردە ۇلتتىق كيىم مەن بۇيىم ساتاتىن اپايىما قولعابىس ەتىپ جۇرگەن ەدىم. بىزگە قاراما- قارسى ساداق اتاتىن جەر جاساپ قويىپتى. بارىپ اتىپ كوردىم. قولىمنان كەلەدى ەكەن. ءسويتىپ، قىزىعۋشىلىعىم ارتا ءتۇستى. ارادا ءبىر جىلعا جۋىق ۋاقىت وتكەندە يۋنۋس ەمرە اتىنداعى تۇرىك مادەني ورتالىعى ساداق اتۋدى ۇيرەتۋ بويىنشا كۋرس وتكىزىپ جاتقانىن ەستىپ، ويلانباستان باردىم. ءۇش ايعا سوزىلعان كۋرستى ءتامامداپ شىقتىم. وڭاي بولعان جوق. سەبەبى ول جاققا بارىپ- كەلۋ ءۇشىن 120 شاقىرىم جول جۇرۋگە تۋرا كەلدى. ونىڭ ۇستىنە قىستىڭ كەزى. قاقاعان اياز»، - دەپ ەسكە الدى ول.

ساداق اتىپ ۇيرەنۋگە دەگەن زور قۇلشىنىسى مۇنداي قيىندىقتاردى وڭاي ەڭسەرگەن. دەسە دە كۇن سايىن ۇزدىكسىز جاتتىعۋ ءۇشىن جەكە ساداعى بولۋ كەرەكتىگىن تۇسىنگەن. وسىلايشا، تۇركيادان ساداق پەن 10 جەبەگە تاپسىرىس بەرەدى. 3 ايدان سوڭ كوپتەن كۇتكەن تاپسىرىسى قولىنا ءتيدى. قىزىنىڭ ىنتاسىن كورگەن اكەسى ءۇي اۋلاسىنا ارنايى الاڭ مەن نىسانا جاساپ بەرگەن. دايىندىق ودان سايىن قىزي ءتۇستى. كوپ ۇزاماي كۋرسقا قاتىسقاندار «ءداستۇرلى ساداق اتۋ» رەسپۋبليكالىق فەدەراتسياسىن قۇرعان.

«بەرىلىپ كەتكەنىم سونشالىق، قولىمدى جاراقاتتاپ العانىمدى دا سەزبەيتىنمىن. 2019 -جىلى العاش رەت جارىسقا قاتىسىپ كوردىم. استانادا ۇيىمداستىرىلعان «ەتنو فەست» سايىسى 3 كەزەڭنەن تۇردى. ءبىرىنشى كەزەڭ - ازيالىق ستيلدە نىساناعا اتۋ. ال ەكىنشىسى - قازاقشا ستيلدە، ءۇشىنشىسى - اڭشىلىق ستيلدە اتۋ. 50 شاقتى ادام قاتىستى. ونىڭ ىشىندە تالاي جىلدان بەرى سپورتتىڭ وسى تۇرىمەن اينالىسىپ كەلە جاتقاندار از ەمەس. ايەل، ەر دەپ بولىنگەن جوقپىز. ەكى كەزەڭنەن سۇرىنبەي ءوتىپ، ۇشىنشىسىنە كەلگەندە جولىم بولمادى. ءبىراق سايىس قورىتىندىسىندا ۇزدىك بەستىككە ەنىپپىن. بۇل مەن ءۇشىن ۇلكەن جەتىستىك بولدى!»، - دەيدى اجار تولەۋقانوۆا.


استانادان اۋىلعا كوشىپ بارعان سول جىلى ول سۇيىكتىسىنىڭ شاڭىراق كوتەرۋ جايلى ۇسىنىسىن قابىل الىپ، تويدىڭ قام- قارەكەتىنە كىرىسىپ كەتكەن. ساداق پەن جەبەنى قولعا الۋعا مۇرشا دا بولمادى. ەكى جارتى ءبىر ءبۇتىن بولىپ قوسىلعان جاستار شىعىس قازاقستان وبلىسى گلۋبوكوە اۋدانىنا كوشىپ كەلگەن.

«ءسويتىپ، وسى جاقتا نەمەن اينالىسامىن دەپ ويلاي باستادىم. جوعارى وقۋ ورنىندا العان ءبىلىمىم - ارحيتەكتور- ديزاينەر. اۋەلى بالالار شىعارماشىلىق ۇيىندە سۋرەت سالۋ ۇيىرمەسىن جۇرگىزدىم. الايدا بۇل جۇمىستى كوڭىلىمنىڭ قالامايتىنىنا كوزىم جەتتى. جارتى جىلدان كەيىن ديرەكتور جاننا يسماعۇلوۆاعا بارىپ، ساداق اتۋ ۇيىرمەسىن اشقىم كەلەتىنىن ايتتىم. وعان قابىلەتىم جەتەتىنىن دالەلدەپ، جوبامنىڭ جاي- جاپسارىن ءتۇسىندىردىم. ول كىسى بىردەن قولداۋ تانىتتى»، - دەيدى 27 جاستاعى كەيىپكەرىمىز.


2020 -جىلى قاڭتاردا گلۋبوكوە اۋىلىندا ۇيىرمە ءوز جۇمىسىن باستادى. ساداقتار مەن جەبەلەرگە تاپسىرىس بەرىلدى. ءبىراق كوروناۆيرۋس پاندەمياسىنىڭ سالدارىنان ۇيىرمە جۇمىسى بىرنەشە ايعا توقتاپ، قىركۇيەكتە قايتا جانداندى. سول ۋاقىتتان بەرى ۇزبەي اينالىسىپ كەلە جاتقان بالالار دا بار.

قازاقتىڭ قانىندا بار ونەر


«قازىرگى ۋاقىتتا 3 توپتا 30 دان استام بالا بار. وقۋشىلاردى 5-سىنىپتان باستاپ قابىلدايمىن. ولار اپتاسىنا ەكى رەت ەش اقىسىز ساداق اتۋدىڭ قىر- سىرىن ۇيرەنۋدە. شاكىرتتەرىم جارىستارعا دا قاتىسىپ ءجۇر. قۇدايعا شۇكىر، جۇلدە جاعىنان قارا جاياۋ ەمەسپىز. 2021 -جىلدىڭ جەلتوقسانىندا ەلورداداعى سايىستا 2 شاكىرتىم ەكىنشى جانە ءۇشىنشى ورىن الدى. 2022 -جىلى ناۋرىزدا قاراعاندى قالاسىندا وتكەن رەسپۋبليكالىق جارىسقا ۇيىرمەمىزدەن بارلىعى 5 بالا باردى. اليسا ميرزانوۆا ەسىمدى وقۋشىم ۇزدىك ناتيجە كورسەتىپ، گران- پري يەگەرى اتاندى. قالعاندارى دا قارسىلاستارىنىڭ ءبىرازىن قاپى قالدىرىپ، جۇلدەلى بولدى»، - دەيدى اجار.


ونىڭ ايتۋىنشا، بالالارىنىڭ جەتىستىككە جەتكەنىن كورگەن اتا- انالار ساباق پەن جەبەلەرىن ساتىپ الىپ بەرىپ جاتىر. ءبىراق بارلىعىنىڭ قالتاسى كوتەرە بەرمەيتىنى انىق. جارىسقا بارعاندا دا جول شىعىندارىن بالالار شىعارماشىلىق ءۇيى مەن اتا- انالار بىرلەسىپ كوتەرەدى. سوندىقتان قارجىلاي قولداۋ تانىتاتىن دەمەۋشىلەر كەرەك- اق.

«ساداق اتۋ - مەن ءۇشىن جان راحاتى. ساداقتى الىپ، جەبەنى ادىرناعا كەرىپ، نىسانانى كوزدەپ اتقاندا كۇيبەڭ تىرلىكتىڭ ءبارىن ۇمىتاسىڭ. بار ويىڭ كوزدەپ تۇرعان نىسانادا. مەنىڭ ويىمشا، ساداق اتۋ ونەرى ءار قازاقتىڭ قانىندا بار. الداعى ۋاقىتتا وسىنداي ۇيىرمەنى وسكەمەندە اشقىم كەلەدى. جۇبايىم قالادان عيمارات قاراستىرىپ ءجۇر. سونداي- اق «ءداستۇرلى ساداق اتۋ» فەدەراتسياسىنىڭ وبلىستىق فيليالىن اشۋدى جوسپارلاپ ءجۇرمىن. قۇجاتتار دايىن تۇر، تەك اككرەديتتەۋ جاعىنان ءبىراز جۇمىس قالدى»، - دەيدى اجار تولەۋقانوۆا.

اۆتور: تالعاتجان مۇحامەتبەك ۇلى


سوڭعى جاڭالىقتار