مەكتەپ ءبىتىرۋ كەشىن مەيرامحانادا وتكىزۋگە، اۆتوكولىكپەن قىدىرۋعا تىيىم سالىندى

ءبىراق بۇل ءىس- شارانىڭ بارلىعى مەكتەپ قابىرعاسىندا وتكىزىلۋى ءتيىس.
بۇل تۋرالى ق ر ءبىلىم جانە عىلىم مينيسترلىگىنىڭ مەكتەپكە دەيىنگى جانە ورتا ءبىلىم كوميتەتىنىڭ تاربيە جۇمىسى جانە قوسىمشا ءبىلىم بەرۋ باسقارماسىنىڭ باسشىسى سامال قادىروۆا ايتىپ بەردى، دەپ حابارلايدى قازاقپارات.
«جوعارى سىنىپ وقۋشىلارى مەكتەپ ءبىتىرۋ كەشىن اسىعا كۇتەتىنى بەلگىلى، ويتكەنى بۇل جاستاردىڭ جاڭا ومىرگە قادام باسقانىن بىلدىرەدى. سوڭعى ەكى جىلدا كوروناۆيرۋس ىندەتى مەكتەپ پەن ۇستازداردىڭ ءداستۇرلى قوشتاسۋ كەشىن توقتاتىپ تاستادى. بۇگىنگى تاڭدا ەپيدەميولوگيالىق جاعداي مۇنداي كەشتى وتكىزۋگە مۇمكىندىك بەرەدى. ءبىراق كەشتىڭ بارلىعى مىندەتتى تۇردە مەكتەپ قابىرعاسىندا وتكىزىلۋى كەرەك. مەكتەپتەردىڭ قامقورشىلىق كەڭەستەرى مەن ءبىلىم باسقارمالارى تۇلەكتەردىڭ اتا- انالارىنا بۇل شارالارعا شىعىندالۋدىڭ ءتيىمسىز ەكەنى تۋرالى ءتۇسىندىرۋ جۇمىستارىن جۇرگىزۋى قاجەت. بۇل كۇن تارتىبىندەگى باستى ماسەلەلەردىڭ ءبىرى»، - دەدى سامال قادىروۆا «جەلىگە شولۋ» جوباسىنىڭ جاڭا سانىندا.
مەكتەپ ءبىتىرۋ شارالارىنا مەكتەپتىڭ پەداگوگيكالىق ۇجىمى، تۇلەكتەر، تۇلەكتەردىڭ اتا- انالارى، پەداگوگيكالىق ەڭبەك ارداگەرلەرى، قامقورشىلىق كەڭەس مۇشەلەرى، پاتروناتتىق ۇيىمدار، وبلىستاردىڭ، نۇر- سۇلتان، الماتى جانە شىمكەنت قالالارىنىڭ ءبىلىم باسقارمالارىنىڭ، ءبىلىم بولىمدەرىنىڭ، مۇددەلى مەملەكەتتىك ورگانداردىڭ وكىلدەرى جانە باسقالار قاتىسا الادى.
ءبىلىم جانە عىلىم مينيسترلىگىنىڭ ۇسىنىمدارىنا سايكەس، مەكتەپ ءبىتىرۋ كەشى ءبىلىم بەرۋ ۇيىمىنىڭ ءوز كۇشىمەن ۇيىمداستىرىلۋى كەرەك.
مىناداي ماسەلەلەرگە رۇقسات ەتىلمەيدى:
- انيماتورلاردى، مەرەكەلىك اگەنتتىكتەردى، اقىلى ارتىستەردى، مەرەكەلىك شارالارعا جەكە ستۋديالاردى تارتۋعا؛
- مەرەكەلىك داستارحان ۇيىمداستىرۋعا؛
- اۆتوكولىكتەردى جالعا الىپ، قالا (اۋدان) بويىنشا ەكسكۋرسيالار وتكىزۋگە؛
- مەكتەپ اكىمشىلىگى مەن مۇعالىمدەرگە سىيلىقتار الۋ ءۇشىن قاراجات جيناۋعا؛
- ويىن- ساۋىق مەكەمەلەرىندە ءبىتىرۋ كەشتەرىن ۇيىمداستىرۋعا بولمايدى.
ايتا كەتەيىك، قازاقستاننىڭ بارلىق مەكتەبىندە سوڭعى قوڭىراۋ مەرەكەسى 2022 -جىلعى 25-مامىردا وتەدى. اتتەستات سالتاناتتى تۇردە 2022 -جىلعى 16-17-ماۋسىمدا تاپسىرىلادى.