دۇنيەجۇزىلىك مۇسىلماندار قاۋىمىنىڭ كەڭەسى شۆەتسيادا قۇران كىتاپتىڭ ورتەلۋىن سىنادى

بۇل تۋرالى قازاقپارات ءتىلشىسى بىرىككەن اراب امىرلىكتەرىنىڭ WAM جاڭالىقتار اگەنتتىگىنە سىلتەمە جاساپ حابارلايدى.
دۇنيەجۇزىلىك مۇسىلماندار قاۋىمىنىڭ كەڭەسى دۇيسەنبىدە جاريالاعان مالىمدەمەدە شۆەتسيادا كورىنىس تاپقان مۇسىلمان قاۋىمىنا دەگەن توزىمسىزدىك پەن وشپەندىلىك تولقىنى الەۋمەتتىك ىنتىماققا قاۋىپتى قۇبىلىس ەكەنىن ايتتى. كەڭەس ەۋروپاداعى مۇسىلماندار قاۋىمىن ارانداتۋ ارەكەتتەرىنە بوي ۇرماۋعا، يسلام دانالىعىنىڭ ۇلگىسى بولىپ، زاڭداردى ساقتاۋعا، الەۋمەتتىك قاۋىپسىزدىك پەن تاتۋلىقتى تۋ ەتۋگە شاقىردى.
ءبىرقاتار اراب ەلدەرى قۇراننىڭ كوشىرمەسىن ورتەپ، اكسيا وتكىزگەن Hard Line پارتياسىنىڭ جەتەكشىسى، ساياساتكەر راسمۋس پالۋداننىڭ ارەكەتىن قاتاڭ سىناعان بولاتىن. وتكەن بەيسەنبىدە وسى پارتيانىڭ مۇشەلەرى بىرنەشە قالادا قۇران كىتاپتى ورتەگەن ۆيدەولار تاراتقان ەدى. يوردانيا، ساۋدا ارابياسى، باحرەين، تۇركيا، كاتار، پاكىستان، ب ا ءا، مىسىر جانە ومان ەلدەرى بۇل اكسيانى «يسلامعا دەگەن فوبيا» دەپ باعالادى. ال يران مەن يراكتاعى شۆەتسيانىڭ ەلشىلەرى سىرتقى ىستەر مينيسترلىگىنە شاقىرىلعان بولاتىن. يراننىڭ سىرتقى ىستەر مينيسترلىگى قالىپتاسقان كيكىلجىڭگە شۆەتسيانىڭ ۇكىمەتى جاۋاپتى ەكەنىن مالىمدەپ، رەسمي ستوكگولمدى شۇعىل شارالار قابىلداپ، مۇنداي اكسيالاردى تىيۋعا شاقىردى. ال يراكتىڭ سىرتقى ىستەر مينيسترلىگى مۇنداي شارالاردىڭ «شۆەتسيا مەن اراب- مۇسىلمان الەمىنىڭ اراسىنداعى قارىم- قاتىناسقا زاردابىن تيگىزەتىنىن» اتادى. ونسىز دا ۋشىعىپ تۇرعان شيەلەنىس پالۋداننىڭ قۇران كىتاپتى كوپشىلىكتىڭ كوزىنشە ورتەيتىن اكسيالاردىڭ جالعاسى بولاتىنىن ايتقاننان كەيىن ودان بەتەر ورشىگەن. وسى سوزدەن كەيىن شۆەتسيالىق مۇسىلماندار مەن پوليسيا وكىلدەرىنىڭ اراسىندا قاتىعىس بولىپ، ونىڭ سوڭى تارتىپسىزدىكتەرگە ۇلاستى.
Al-Bawaba اقپارات پورتالىنىڭ جازۋىنشا، https://www.albawaba.com/node/violent-tensions-sweden-far- right-group-pledges-burn-quran-1473849 شۆەتسيانىڭ پرەمەر- ءمينيسترى ماگدالەنا اندەرسسون تولاسسىز تارتىپسىزدىكتەرگە جاۋاپ رەتىندە راسمۋس پالۋدانعا ونداي شارالار وتكىزۋگە تىيىم سالا المايتىندارىن ءمالىم ەتكەن. ويتكەنى بۇل ەلدىڭ زاڭدارى ازاماتتارى ءوز ويىن ەش كەدەرگىسىز بىلدىرۋگە مۇمكىندىك بەرەدى.
ت ا س س اگەنتتىگىنىڭ مالىمەتى بويىنشا، راسمۋس پالۋدان Hard Line پارتياسىنىڭ نەگىزىن 2017 -جىلى قالاعان. ساياساتكەردىڭ ءوزى YouTube-تەگى انتييسلاميستىك ۆيدەولارىمەن تانىمال. ول قۇران كىتاپتى ورتەپ تۇرىپ، مۇنى ءسوز ەركىندىگىنە دەگەن قۇرمەت دەپ اتاعان ەدى. پالۋدان جەتەكشىلىك ەتەتىن پارتيا ەلدە يسلامعا تىيىم سالىپ، دانيادان پانا تاپقان «باتىستىق ەمەس تۇلعالاردىڭ» ءبارىن دەپورتاتسيالاۋدى تالاپ ەتىپ ءجۇر.
ەسكە سالساق، شۆەتسيانىڭ بىرنەشە قالاسىندا، پاسحا مەرەكەسى كەزىندە ۋلتراوڭشىل توپتىڭ ارانداتۋشىلىق ارەكەتىنە بايلانىستى تارتىپسىزدىكتەر ورىن العان بولاتىن.