بيىل ءبىلىم بەرۋ گرانتتارىنىڭ سانى وسەدى

نۇر-سۇلتان. قازاقپارات - كەلەسى وقۋ جىلى ءۇشىن جوعارى وقۋ ورىندارىنا 73 مىڭ، كوللەدجدەرگە 31 مىڭ گرانت بولىنەدى.
None
None

بۇل تۋرالى ق ر ءبىلىم جانە عىلىم ءمينيسترى اسحات ايماعامبەتوۆ ايتىپ بەردى، دەپ حابارلايدى قازاقپارات.

«جالپى ەلىمىزدىڭ كادر دايىندايتىن وقۋ ورىندارىندا قازىر 1,1 ميلليون استام ستۋدەنت ءبىلىم الۋدا، ورتاشا ەسەپپەن جىل سايىن ولاردىڭ 300 مىڭى جۇمىس نارىعىنا شىعادى. ساپالى كادر دايىنداۋ ءۇشىن جۇمىس ەڭ باستى 6 باعىت بويىنشا جۇرگىىزلۋدە. سونىڭ ىشىندە بىلىمگە قولجەتىمدىلىكتى كەڭەيتۋ، اكادەميالىق ەركىندىكتى كەڭەيتىپ، مەنەدجمەنتتى جەتىلدىرۋ، ءبىلىم بەرۋ باعدارلامالارىن جاڭارتىپ، جاڭا باعدارلامالار اشۋ، جۇمىس بەرۋشىلەردى كادرلاردى دايارلاۋعا تارتۋ جانە ساپانى قامتاماسىز ەتۋ جۇيەسى بويىنشا جۇمىس ءجۇرىپ جاتىر»، - دەدى ءبىلىم ءمينيسترى ۇكىمەتتىڭ بۇگىنگى وتىرىسىندا.

جوعارى بىلىمگە قولجەتىمدىلىك بويىنشا سوڭعى بىرنەشە جىلدا گرانت سانى ەكى ەسەگە استى. بيىل ەڭ كوپ 73 مىڭ گرانت قاراستىرىلىپ وتىر. ستۋدەنتتەردىڭ ستيپەندياسى دا ەكى ەسە ارتتى.

«ءبىز ۇ ب ت-نى تسيفرلىق فورماتقا كوشىردىك جانە جىلىنا 4 رەت تاپسىرۋ مۇمكىندىگىن ەنگىزدىك. بۇل ءبىزدىڭ تالاپكەرلەر ءۇشىن وتە قولايلى جۇيە. وعان قوسا، 11-سىنىپ بىتىرۋشىلەرى شىلدەدە ەمەس، قاڭتار ايىنان باستاپ، وقۋعا شارتتى تۇسە الادى. بۇل دا وزگە مەملەكەتكە كەتپەۋ ءۇشىن وتە قولايلى شەشىمدەردىڭ ءبىرى دەپ ايتۋعا بولادى. ءبىراق تالاپتار دا كۇشەيتىلىپ وتىر، پەداگوگيكا بويىنشا شەكتى بالل 50-دەن 75-كە دەيىن كوتەرىلدى. مەديتسينالىق باعىت بويىنشا - 70 جانە زاڭ باعىتتارى بويىنشا - 75-كە دەيىن كوتەرىلدى»، - دەدى ا. ايماعامبەتوۆ.

پرەزيدەنت تاپسىرماسىمەن تەحنيكالىق ماماندىقتارعا گرانت ۇلەسى 40 پايىزدان 60 پايىزعا دەيىن كوبەيتىلدى.

«كوللەدجدەردە دە وقۋ گرانتتارى سانى جىل سايىن ۇلعايدى. بيىل ولاردىڭ سانى رەكوردتىق 31 مىڭعا ءوسىپ وتىر. ونىڭ 70 پايىزى تەحنيكالىق ماماندىقتارعا بەرىلەدى. كوللەدجدەردە وقۋعا قولجەتىمدىلىكتى كەڭەيتۋ ءۇشىن ەمتيحانداردى الىپ تاستادىق، الەۋمەتتىك جاعدايى تومەن وتباسىلارعا ارنايى كۆوتا بەرىلەدى. ال گرانتتار باياعىداي ءار كوللەدجگە بولىنبەيدى. ەندى ناقتى تالاپكەر ستۋدەنت ءتيىستى گرانتتى جەڭىپ الادى، سودان كەيىن عانا كوللەدج تاڭدالادى. سايكەسىنشە بۇل شارا ولاردىڭ باسەكەلەستىگىن ارتتىرادى»، - دەدى اسحات ايماعامبەتوۆ.

اۆتور: ايجان سەرىكجان قىزى

سوڭعى جاڭالىقتار