پوليسيادانمىن دەپ حابارلاساتىن الاياقتار كوبەيىپ كەتتى – ق ر ءى ءى م

بۇل تۋرالى ق ر ىشكى ىستەر مينيسترلىگىنىڭ وكىلى شۇعىلا تۇرلىباي ءمالىم ەتتى، دەپ حابارلايدى قازاقپارات ءتىلشىسى.
«ىشكى ىستەر مينيسترلىگى قازاقستاندىقتاردى جاڭادان پايدا بولعان الاياقتىق ارەكەت تۋرالى ەسكەرتەدى. سوڭعى ۋاقىتتا پوليسيا جانە باسقا دا قۇقىق قورعاۋ ورگاندارىنىڭ قىزمەتكەرىمىن دەپ جالعان نومىردەن حابارلاساتىن الاياقتار كوبەيىپ بارادى. مىسالى، الاياق ءوزىن تەرگەۋشىمىن دەپ تانىستىرىپ، ونلاين نەسيە راسىمدەۋگە قاتىستى پوليسياعا زارداپ شەگۋشىلەردىڭ شاعىم جاساپ جاتقانىن ايتادى. ارتىنشا ول ادامنان جەكە مالىمەتتەردى سۇراي باستايدى. ونداعى ماقسات - كليەنتتىڭ ج س ن، بانك كارتاسى مەن ەسەپشوتىنا قول جەتكىزۋ. ودان ءارى الاياقتىق ارەكەت جاسايدى»، - دەدى شۇعىلا تۇرلىباي مينيسترلىكتە وتكەن باسپا ءسوز ءماسليحاتىندا.
مينيسترلىك وكىلى پوليسيا قىزمەتكەرلەرىنىڭ ازاماتتاردان جەكە مالىمەتتەر مەن بانك ەسەپشوتىنا قاتىستى دەرەكتى سۇرامايتىنىن ەسكەرتەدى.
«ەگەر سىزگە بەيتانىس ادام حابارلاسىپ، ءوزىن پوليسيا نەمەسە بانك قىزمەتكەرىمىن دەپ تانىستىرىپ جەكە مالىمەتتەرىڭىزدى سۇراسا دەرەۋ شارا قابىلداۋدى سۇرايمىز. سونىمەن قاتار بانك كارتاسى مەن ەسەپشوتتىڭ قۇپياسوزىن وزىڭىزدەن باسقا ەشكىم بىلمەگەنى ءجون. سول سياقتى بوگدە ادامعا جەكە مالىمەتتەردى تاراتپاعان ابزال»، - دەيدى ول.
بۇعان دەيىن حابارلاعانىمىزداي، قازاقستاندا ينتەرنەت الاياقتىق %34 عا ازايدى.