الماتىدا روزا باعلانوۆاعا ەسكەرتكىش ورناتىلدى

الماتى. قازاقپارات - الماتىدا وپەرا جانە ەسترادا ءانشىسى، ك س ر و حالىق ءارتىسى، قازاقستاننىڭ حالىق قاھارمانى روزا باعلانوۆاعا ەسكەرتكىش قويىلدى، دەپ حابارلايدى قازاقپارات ءتىلشىسى.
None
None

ەسكەرتكىش كورنەكتى وپەرا جانە ەسترادا ءانشىسىنىڭ 100 جىلدىعىن مەرەكەلەۋ اياسىندا تولە ءبي كوشەسى مەن قالداياقوۆ كوشەسىنىڭ قيىلىسىندا جامبىل اتىنداعى قازاق مەملەكەتتىك فيلارمونياسى عيماراتىنىڭ الدىندا ورناتىلدى.

ونىڭ بيىكتىگى - 4,8 مەتر. قولا جانە گرانيتتەن جاسالعان. اۆتورلارى - د. اعزاموۆ، ۋ. اقجولتاي، ا. جامحان، ا. قابىل.

ايتا كەتەيىك، روزا باعلانوۆا فيلارمونيا قابىرعاسىندا 1949-1960-جىلدار ارالىعىندا ونەر كورسەتكەن. سالاناتتى شاراعا زيالى قاۋىم وكىلدەرى قاتىستى.

اتاپ ايتار بولساق، قازاقستاننىڭ ەڭبەك ەرى، تەاتر جانە كينو اكتەرى ءاسانالى ءاشىموۆ، قازاقستاننىڭ ەڭبەك ەرى الىبەك دىنىشيەۆ، قازاقستاننىڭ حالىق ءارتىسى التىنبەك قورازبايەۆ، مادەنيەت قايراتكەرى قۋانىش ءابدىقالىموۆ، فيلولوگ ءارى اقىن اققۇشتاپ باقتىگەرەيەۆا، ءانشىنىڭ تۋعاندارى مەن جاقىندارى - ۇلى تاجەن مەن كەلىنى مارال باعلانوۆتار بار.

ەسكەرتكىشتىڭ ورناتىلۋىنا ارنالعان سالتاناتتى شارا بارىسىندا الماتى قالاسىنىڭ اكىمى ەربولات دوسايەۆ روزا باعلانوۆانىڭ قازاق حالىق مۋزىكاسى مەن قازاقستان كومپوزيتورلارىنىڭ شىعارماشىلىعىن دامىتۋعا جانە ناسيحاتتاۋعا قوسقان باعا جەتپەس زور ۇلەسىن اتاپ ءوتتى.

«ءبىزدىڭ ۇلى ءانشىمىز روزا باعلانوۆاعا ەسكەرتكىش ورناتۋ - ونىڭ مۇراسىن قۇرمەتتەۋ جانە ەستە ساقتاۋ. ول مۋزىكا ونەرىنىڭ شىرقاۋ بيىگىندەگى جارىق جۇلدىز بولدى. ونىڭ ەرەكشە داۋىسى مەن تالانتى حالقىمىزدىڭ باعا جەتپەس قۇندىلىعىنا اينالدى. ءانشىنىڭ سۇيىكتى قالاسى - الماتىدا 100 جىلدىق مەرەيتوي اياسىندا روزا باعلانوۆانىڭ ەسىمىن ماڭگى ەستە قالدىرۋ ءۇشىن ەسكەرتكىش ورناتقانىمىزعا شەكسىز قۋانىشتىمىن»، - دەدى ەربولات دوسايەۆ.

سونداي-اق رەسپۋبليكا سارايىندا «اقماڭدايلىم» اتتى مەرەكەلىك كونسەرت ءوتتى.

اتى اڭىزعا اينالعان ءانشىنىڭ رەپەرتۋارىنداعى كومپوزيتسيالاردى تانىمال قازاقستاندىق ارتىستەر ورىندادى.


سوڭعى جاڭالىقتار