تەڭىز جاياۋ اسكەرى قالا ىشىندە ۇرىس جۇرگىزۋ بويىنشا جاتتىقتى - فوتو

وقۋ- جاتتىعۋ جوسپارىنا سايكەس، تەڭىز جاياۋ اسكەرىنىڭ بريگاداسىنا ەلدى مەكەندى زاڭسىز قارۋلانعان قۇرامالاردان تازارتۋ مىندەتى جۇكتەلدى. بارلاۋ، تانك، ارتيللەريا، زەنيتتىك، ينجەنەرلىك- ساپەرلىك بولىمشەلەردەن، سونداي-اق ارميانىڭ اۆياتسيالىق توپتارى جانە ۇشقىشسىز ۇشۋ اپپاراتتارىنىڭ ەسەپتوپتارىنان كۇشەيتىلگەن باتالوندىق تاكتيكالىق توپ قۇرىلدى. 400-دەن استام اسكەري قىزمەتشى تارتىلىپ، 100-گە جۋىق قارۋ- جاراق پەن اسكەري تەحنيكا جۇمىلدىرىلدى. تەڭىزشىلەر شارتتى جاۋىنگەرلىك قولدانۋ ايماعىنا مارش جاساپ، ايماققا توسقاۋىل قويدى. ۇشقىشسىز باسقارىلاتىن قۇرىلعىلارمەن جاسالعان ۇزدىكسىز بارلاۋ ناتيجەسى سودىرلاردىڭ كۇشتەرى مەن قۇرالدارىنىڭ جينالعان جەرىن انىقتاۋعا مۇمكىندىك بەردى.
سودىرلار بەرىلۋدەن باس تارتقان سوڭ، قولداعى بار قارۋمەن ولاردىڭ كوزىن جويدى. ال اسكەري قىزمەتشىلەر ەلدى مەكەننىڭ بارلىق نىساندارىنا باقىلاۋ ورناتتى.
- قالاداعى ۇرىس - جاۋىنگەرلىك ءىس- قيمىلدىڭ اسا كۇردەلى تۇرلەرىنىڭ ءبىرى. سوندىقتان، ءىرى قالالاردا، ياعني ادام كوپ شوعىرلانعان ورتادا ارەكەت ەتۋ ءۇشىن اسكەرلەردى دايارلاۋ جۇيەسىن جەتىلدىرەمىز. بۇل وقۋ- جاتتىعۋعا قاتىسۋشىلاردىڭ ءبارى كۇردەلى ءارى تەز وزگەرەتىن جاعدايدا كاسىبي ءىس- قيمىلداعى ەپتىلىگىن كورسەتتى، - دەپ اتاپ ءوتتى تەڭىز جاياۋ اسكەرلەرى بريگاداسىنىڭ كومانديرى، پودپولكوۆنيك جاننۇر ساتقىنوۆ. سونداي-اق، تاكتيكالىق وقۋ- جاتتىعۋ بارىسىندا شەكارا قىزمەتى مەن قارۋلى كۇشتەردىڭ بولىمشەلەرى باندا قۇرامالارى رەزەرۆتەرىنىڭ كىرۋىنە جول بەرمەۋ ءۇشىن مەملەكەتتىك شەكارانى كۇزەتۋدى كۇشەيتۋگە قاتىستى وقۋ- جاۋىنگەرلىك تاپسىرمالاردى ورىندادى. ۇلتتىق ۇلان مەن پوليتسيا جاقىن ماڭداعى ەلدى مەكەندەردە سوعىس جاعدايىندا قۇقىقتىق رەجيمدى قولداۋ جونىندەگى شارالاردى جۇزەگە اسىردى. بۇل شارالار تەڭىز جاياۋ اسكەرلەرىنىڭ بەلگىلەنگەن جاۋاپكەرشىلىك ايماعىندا ارنايى اسكەري ءىس- قيمىلدى ناتيجەلى وتكىزۋىنە سەپتىگىن تيگىزدى.
ايتا كەتەيىك، مەملەكەت باسشىسى قاسىم-جومارت توقايەۆتىڭ كۇشتىك قۇرىلىمداردى ءتيىمدى ۇيلەستىرۋدى قامتاماسىز ەتۋ، ولاردىڭ جەدەل جانە اسكەري- تەحنيكالىق ۇيلەسىمدىلىگىن جولعا قويۋ، سونداي-اق ۆەدومستۆوارالىق ۇيلەستىرۋدى كۇشەيتۋ جونىندەگى تاپسىرمالارىن ىسكە اسىرۋ اياسىندا «باتىل تويتارىس-2022» ستراتەگيالىق كوماندالىق- شتابتىق وقۋ- جاتتىعۋى 6-ساۋىردە باستالعان بولاتىن.