نيۋ-يورك مەتروسىندا جولاۋشىلارعا وق جاۋدىرعان اتقىش ۇستالدى

پوليتسيا 62 جاستاعى فرەنك دجەيمستى مانحەتتەننىڭ يست-ۆيلليدج اۋدانىندا ۇستادى. برۋكليننىڭ وڭتۇستىگىندەگى 36-كوشەدەگى مەترو ستانسياسىندا تاڭەرتەڭگى قاربالاس ۋاقىتتا اتىس بولىپ، سالدارىنان ونداعان ادام جاراقات العان.
«نيۋ-يورك پوليتسياسىنىڭ جۇزدەگەن دەتەكتيۆى سوڭعى 30 ساعات ىشىندە كوپ جۇمىس اتقاردى. ولار ف ت ب، لاڭكەستىككە قارسى بىرلەسكەن ورتالىق، نيۋ-يورك پوليتسياسىنىڭ قارۋ قولدانىلعان قىلمىستاردى بارلاۋ ورتالىعى جانە ا ق ش مارشالدارى باسقاراتىن ايماقتىق جۇمىس توبىن قوسا العاندا، قۇقىق قورعاۋ سالاسىنداعى ارىپتەستەرىمىزبەن بىرلەسىپ جۇمىس ىستەگەن. ءبىز ونى قورشاپ الدىق. قاشاتىن جەرى بولمادى»، - دەپ ءمالىم ەتتى نيۋ-يورك پوليتسياسىنىڭ كوميسسارى كيچانت سيۋەلل.
پوليتسەيلەر كۇدىكتىنىڭ الەۋمەتتىك جەلىدە ادەپسىز سوزدەرگە تولى جازبالارىن تەكسەرىپ، وسىنداي ارەكەت جاساۋىنىڭ سەبەبىن انىقتاۋعا تىرىسىپ جاتىر. دجەيمس شابۋىلدان ءبىر كۇن بۇرىن YouTube سايتىندا جاريالانعان ءبىر ۆيدەودا قارا ناسىلدىلەرگە قارسى قىلمىستاردى سىناپ، وعان شارا قولدانۋ كەرەگىن ايتادى.
ەسكە سالا كەتسەك، بىرنەشە كۇن بۇرىن نيۋ-يوركتەگى برۋكلين ستانسياسىندا اتىس بولىپ، كەمىندە 13 ادام جاراقات الدى.