ستۋدەنتتەر وزدەرى سالعان جىلىجايدان ءونىم الا باستادى

تالدىقورعان. قازاقپارات - الماتى وبلىسىنداعى سارقان اۋدانىنىڭ جاستارى ەشبىر شىعىنسىز جىلىجاي سالىپ، ودان ءونىم الا باستادى، دەپ حابارلايدى قازاقپارات ءتىلشىسى.

پوليتەحنيكالىق كوللەدج ستۋدەنتتەرى جالپى اۋدانى 200 شارشى مەتر بولاتىن جىلىجايدى قولدا بار زاتتاردان سالعان. نىسان قۇرىلىسىنا 100 دەن اسا ەسكى تەرەزە مەن 10 عا جۋىق جىلۋ باتارەياسى جۇمسالدى. جاستاردىڭ باستاماسىنا قولداۋ بىلدىرگەن وقۋ ورنىنىڭ باسشىلىعى قاجەتتى قۇرال- جابدىقتارمەن قامتاماسىز ەتىپ، ەلەكتر جەلىلەرىن تارتۋعا، تۇقىم الۋعا كومەكتەسكەن.

«جىلىجاي قۇرىلىسىن وتكەن كۇزدە باستاعان ەدىك. ارينە، باستاپقى كەزدە قيىن بولعانى راس. ىرگەسى قالانعان سوڭ جۇمىس قىزا ءتۇستى. اقپان ايىندا العاشقى ءونىمدى الدىق. بۇگىندە كوللەدجىمىزدىڭ ستۋدەنتتەرىن جەرگىلىكتى كوكونىستەرمەن قامتاماسىز ەتىپ وتىرمىز»، - دەيدى Ⅲ كۋرس ستۋدەنتى ماقسات ۇمبەتوۆ. جىلىجايدان جىل ون ەكى اي بويى ءونىم الىنادى. وندا قيار، قىزاناق، پياز، شالعام سياقتى كوكونىستىڭ بىرنەشە ءتۇرى بار. وسى اي - قياردىڭ ءپىسىپ جەتىلەتىن ۋاقىتى.