اعىلشىن جازۋشىسى قازاق تاريحى تۋرالى كىتاپ جازدى

None
None
نۇر-سۇلتان. قازاقپارات - ەلوردادا ۇلى بريتانيالىق جازۋشى، ساياحاتشى نيك فيلديڭگتىڭ «ۇلى دالا ساياساتشىلارى: پاپا ەلشىلەرىنەن باستاپ، رەسەي ريەۆوليۋتسياسىنا دەيىن» اتتى كىتابىنىڭ تانىستىرىلىمى ءوتتى.

بۇل جايلى inbusiness.kz جازدى.

كىتاپ اعىلشىن تىلىنەن قازاق جانە ورىس تىلدەرىنە اۋدارىلعان. وندا شەتەلدىك جازۋشى قازاق دالاسىندا ساپار شەككەن ساياحاتشىلار مەن ولاردان قالعان تاريحي مۇرانى تۇگەندەۋگە تىرىسقان.

«بۇل كىتاپتا قازاق دالاسى، ساياحاتشىلار تۋرالى قىزىق دەرەكتەر بار. بۇل 1 مىڭ جىلدىق تاريحتى قامتيدى. مەن تاريحي دەرەكتەردى زەرتتەپ، وسى كىتاپتى جازدىم. بۇل قازاق دالاسى تۋرالى اعىلشىن تىلىنەن اۋدارىلعان العاشقى كىتاپ بولىپ سانالادى»، - دەدى نيك فيلديڭ.

ول بۇل كىتاپتى جازۋ ءۇشىن ءبىراز جىل ەڭبەكتەنگەنىن اتاپ ءوتتى.

«مەن جەتىسۋ وڭىرىنە 10 جىلدان اسا ۋاقىت ساياحات جاسادىم. ناتيجەسىندە كوپتەگەن تاريحي دەرەك جينادىم. مىسالى، قازاق دالاسىندا بولعان شەتەلدىك ساياحاتشىلار تۋرالى قىزىق مالىمەتتەر تاپتىم. ۇلى دالادا بولعان ساياساتشىنىڭ ءبىرى - دجون كاسسەل»، - دەدى جازۋشى.

نيك فيلديڭتىڭ ايتۋىنشا، دجون كاسسەل قازاق دالاسىندا 1730-جىلدارى بولىپ، كىشى ءجۇزدىڭ حانى ابىلقايىرمەن كەزدەسكەن.

«ول حاننىڭ پورترەتىن سالعان، ءارى ونىڭ اڭگىمەلەرىن قاعاز بەتىنە ءتۇسىرىپ وتىرعان. سوندىقتان بىزدە اعىلشىن تىلىندە جازىلعان كىشى ءجۇزدىڭ حانى تۋرالى قۇندى مالىمەتتەر بار. مەنىڭ ويىمشا، بۇل وقىرمانعا وتە قىزىق بولۋى كەرەك»، - دەدى بريتاندىق جازۋشى.

كىتاپتىڭ تانىستىرىلىمىنا قازاقستاننىڭ ۇلىبريتانياداعى ەلشىسى ەرلان ىدىرىسوۆ، ۇلى بريتانيانىڭ قازاقستانداعى ەلشىسى كەتي ليچ، Qazaq Geography باسقارما ءتوراعاسى ورمان نۇربايەۆ، شەتەلدىك ديپلوماتيالىق كورپۋستىڭ وكىلدەرى، تاريحشىلار، ەتنوگرافتار، ولكەتانۋشىلار، عالىمدار قاتىستى.

سوڭعى جاڭالىقتار