تولەگەننىڭ «ءبىر تويىم بار» ولەڭى قالاي جازىلدى؟

نۇر-سۇلتان. قازاقپارات - ەشكىمگە ۇقسامايتىن، ەشكىمدى قايتالامايتىن، جەر بەتىندە از ءجۇرىپ، شەكسىز عۇمىرعا اينالعان اشەكەي جىر يەسى، قازاق ولەڭىنە وزىندىك جاڭا ىرعاعىمەن، تەگەۋرىندى ەكپىنىمەن كەلگەن اقىن تولەگەن ايبەرگەنوۆتىڭ ولەڭدەرى قاي قازاقتىڭ بولماسىن كوڭىلىن سەرپىلتىپ، جۇرەگىن تەربەيتىنى انىق.

از عۇمىر جاساسا دا، ارتىنا ءىز تاستاپ كەتكەن تالانت يەسىنىڭ ايگىلى «ءبىر تويىم بار» ولەڭى قالاي جازىلدى؟ جۇرت جاتقا سوعاتىن جىردىڭ جازىلۋ تاريحىنا ءۇڭىلىپ كورەيىك.

«كازگۋ- دە وقىپ جۇرگەندە تولەگەن اعامنىڭ ۇيىنە ءجيى بارىپ تۇردىم. مارقۇم ءۇرنيسا جەڭەشەم وتە ەمەن-جارقىن ادام ەدى. شاي ۇستىندە اڭگىمەمىز بىتپەيتىن. مەنىڭ بارلىق سۇراقتارىما ەرىنبەي جاۋاپ بەرەتىن. بىردە «ءبىر تويىم باردىڭ» جازىلۋ تاريحىن سۇرادىم.

— ءبىزدىڭ اۋىلدا (تاشكەنت جاقتا، — ب. ب) ۇلكەن توي ءوتتى، — دەدى جەڭەشەم، — بايگە، كوكپار، ءبارى بولدى. تولەگەن بورىبەكتىڭ (جەڭەشەمنىڭ ءىنىسى، — ب. ب) اتىن ءمىنىپ، كوكپارعا دا ارالاسىپ كوردى. اتتان قۇلاسا دا، ءماز بولىپ كەلدى. سول توي وعان ەرەكشە اسەر ەتتى.

الماتىعا ورالدىق. ەگىز قىزعا اياعىم اۋىر كەز. اعاڭ ۇيگە كەلگەن جىگىتتەرمەن اڭگىمە ايتىپ وتىر. سول توي تۋرالى كوپ ايتتى. شاي ۇستىندە جىگىتتەردىڭ ءبىرى:

— ءۇرنيسا ۇل تۋاتىن سياقتى، — دەدى قالجىڭداپ. سوندا توكەڭ:

— ءاي، بىلمەيمىن. اكەم جالعىز ەكەن، مەن دە سولايمىن. داۋرەنىم بار عوي. ءبىراق كەيدە جالعىزدىعىم جەتى اتاعا دەيىن سوزىلا ما دەپ قورقامىن، — دەپ مۇڭايىپ قالدى. ءبىر كەزدە كۇرت سەرپىلىپ:

— ەگەر، ايتقانىڭ كەلىپ، ءۇرنيسا ۇل تاپسا، مىنا تۇرعان لاشىعىمدى، بار دۇنيە-مۇلكىمدى ساتىپ، توي جاسايمىن. ۋادە، — دەدى. جىگىتتەر ءبىراز دۋىلدادى. قوناقتار كەتكەسىن دە جەر-كوككە سىيماي، قاناتتانىپ ءجۇردى. سوسىن وسى «ءبىر تويىم باردى» جازدى...»

باۋىرجان باباجان ۇلى

massaget.kz