پرەزيدەنتتىڭ جولداۋى قىتايدىڭ الەۋمەتتىك جەلىلەرىندە قىزۋ تالقىعا ءتۇستى
قۇجات ەلدە عانا ەمەس، كورشىلەس قىتاي ەلىندە دە الەۋمەتتىك جەلىدە كوپشىلىكتىڭ نازارىن اۋدارىپ، تالقىعا ءتۇستى، دەپ حابارلايدى قازاقپارات.
قىتايداعى WEIBO الەۋمەتتىك جەلىسىندە قازاقستان رەسپۋبليكاسىنىڭ قىتايداعى ەلشىلىگى جاريالاعان اقپارات پاراقشاسىندا قىتايدىڭ كوپتەگەن جەلى قولدانۋشىلارى پرەزيدەنت توقايەۆتىڭ جولداۋىنا قاتىستى ءوز پىكىرلەرىن ءبىلدىرىپ جاتىر.
قىتايلىق پىكىرلەردىڭ كوپشىلىگىندە پرەزيدەنت توقايەۆتىڭ رەفورمالىق شەشىمدەرى جوعارى باعالانعان. اسىرەسە، پرەزيدەنت توقايەۆتىڭ جولداۋىنداعى «بۇگىندە ەلىمىزدە بارلىعى پرەزيدەنتتىڭ توڭىرەگىندە ءوربيدى، بۇل دۇرىس ەمەس. ءبىز بۇل تاجىريبەدەن بىرتىندەپ باس تارتۋىمىز كەرەك. مەن ءۇشىن بيلىك پەن سيتۋاتسيالىق ىقپالدىڭ كەز كەلگەن قوسىمشا تەتىكتەرىنەن گورى مەملەكەتتىڭ ۇزاق مەرزىمدى مۇددەسى ماڭىزدى» دەگەن ءسوزى، قىتايلىق جەلى قولدانۋشىلارىنىڭ ەرەكشە جوعارى باعالاۋىنا يە بولدى.
سولاردىڭ ءبىرى: «قازاقستان - ۇلى ەل، دەموكراتيانىڭ نۇرى وسىناۋ اسەم جەردى جابادى» دەپ جازسا، تاعى ءبىر قىتايلىق جەلى قولدانۋشىسى: «توقايەۆ قازاقستان تاريحىندا حالىقتىق دەموكراتيا مەن بوستاندىق جولىن ۇستاناتىن داۋىرلىك تۇلعاعا اينالادى» دەپ جازدى.
تاعى ءبىر قىتايلىق جەلى قولدانۋشىسى: «بيلىكتەگى ادامعا ءوز بيلىگىن شەكتەۋ وڭاي ەمەس، ال توقايەۆ بولاشاقتا قازاقستان ءۇشىن ۇزاق مەرزىمدى بەيبىتشىلىك پەن تۇراقتىلىق ىزدەگىسى كەلەدى، ول تابىسقا جەتەدى دەپ سەنەمىن» دەپ پىكىر ءبىلدىردى.
قىتايلىق جەلى قولدانۋشىنىڭ ءبىر: «بۇل دۇرىس جول، قازاقستاندى جارىلقاسىن» دەپ جازدى. سونداي اق، WEIBO الەۋمەتتىك جەلىسىندەگى قىتايلىق جەلى قولدانۋشىلارى قازاقستان حالقىنا پرەزيدەنت توقايەۆتىڭ رەفورمالارى اياسىندا گۇلدەنگەن بولاشاققا قادام باسۋىن تىلەدى.
ازىرگە قازاقستاننىڭ قىتايداعى ەلشىلىگىنىڭ Weibo جەلىسىندە جاريالانعان اقپارات جازبانى 1200-دەن استام ادام ءبولىسىپ، 600-دەن استام ادام پىكىر قالدىرعان، 15 مىڭنان استام لايك جيناعان.
اۆتور: مۇحتار مۇرات
