پرەزيدەنت: قاڭتار وقيعاسىنا كىنالىلەردىڭ ءبارى جازالانادى

نۇر-سۇلتان. قازاقپارات - قاڭتار وقيعاسىنا قاتىسى بار كۇشتىك قۇرىلىم وكىلدەرىنىڭ ءىسى ۇدەمەلى قارقىنمەن، «قۇپيالىق» رەجيمىندە جالعاسىپ جاتىر.

بۇل تۋرالى ق ر پرەزيدەنتى قاسىم-جومارت توقايەۆ قازاقستان حالقىنا جولداۋىندا ايتتى، دەپ حابارلايدى قازاقپارات ءتىلشىسى.

«كۇش قۇرىلىمدارىنىڭ وكىلدەرى مەن ولاردىڭ سىبايلاستارىنىڭ استىرتىن كەلىسىمى جونىندەگى ءىستى تەرگەۋ ۇدەمەلى قارقىنمەن، «قۇپيالىق» رەجيمىندە جالعاسىپ جاتىر. الدىمىزدا كۋاگەرلەرمەن، ساراپتاما جۇرگىزۋ، ءتۇرلى دەرەكتەردى زەردەلەۋ بويىنشا ۇلكەن جۇمىس كۇتىپ تۇر. ءبىر نارسەنى ايتا الامىن. جوعارى باسشىلىقتى ىعىستىرىپ، ونى حالىق پەن الەم قاۋىمداستىعى الدىندا ديسكرەديتتەۋدى ماقسات ەتكەن اۋقىمدى، ءار تەتىگىنە دەيىن ويلاستىرىلعان وپەراتسيا بولدى»، - دەدى مەملەكەت باسشىسى.

ونىڭ ايتۋىنشا، قاستاندىق ۇيىمداستىرۋشىلار بۇل ماقساتقا الماتى قالاسىن ەرەكشە ماقساتتا پايدالانباق بولعان.

«وسى ماقساتقا جەتۋ ءۇشىن استىرتىن كەلىسىم جاساۋشىلار ويلانباستان ءبىزدىڭ ەڭ ءىرى قالامىز - الماتىدا حاوس ورناتۋ، ادامداردىڭ كوڭىلىنە ۇرەي ۇيالاتۋ، ەلدەگى احۋالدى تۇراقسىزداندىرۋ تۋرالى تاپسىرما العان، كاسىبي دايىندالعان جاۋىنگەرلەردى قولداندى. سوندىقتان بۇل قايعىلى وقيعالارعا كىنالى ادامداردىڭ ءبارى ولار قوعامدا قانداي لاۋازىم مەن بەدەلگە يە ەكەنىنە قاراماستان جازا ارقالايتىنىنا سەندىرەمىن»، - دەدى قاسىم-جومارت توقايەۆ.

اۆتور: ەسىمجان ناقتىباي