كيەۆ تاعى اتقىلاندى
بۇعان دەيىن قالانىڭ باتىسىندا ەكى جارىلىس ەستىلگەن. كەشە شاھاردى بومبالاۋدان 3 بەيبىت تۇرعىن قازا تاۋىپ، 10 ادام جاراقات العان ەدى. ال اقپارات قۇرالدارى رەسەي اسكەرى كيەۆكە شابۋىلداعانمەن، ۋكراينالىق كۇشتەردىڭ قاتتى قارسىلىعىنا تاپ بولىپ، العا جىلجي الماي وتىرعانىن ايتادى.
رەسەي كۇشتەرى حاركوۆتى بومبالاۋدى قايتا كۇشەيتتى. سونداي-اق رەسەي اسكەرى حاركوۆ قالاسىن بومبالاۋدى كۇشەيتكەن. حاركوۆ وبلىسىنىڭ اسكەري- ازاماتتىق اكىمشىلىگى باسشىسى ولەگ سينەگۋبوۆتىڭ ايتۋىنشا، مەكتەپتەر مەن بالاباقشالارى بار تۇرعىن الاپتار اتقىلانىپ جاتىر. قازىرگە دەيىن 600 دەي تۇرعىن ءۇي مەن 50 مەكتەپ تاس تالقان ەتىلگەن. ءبىراق ۋكراينا اسكەرى رەسەي كۇشتەرىن قالاعا كىرگىزبەي، قارسى شابۋىلدار ۇيىمداستىرىپ جاتىر.
اناتولي تويارنيك، حاركوۆ جەدەل جاردەم قىزمەتىنىڭ وكىلى:
- حاركوۆتىڭ تاريحي ورتالىعىندا ورنالاسقان تۇرعىن ۇيگە 2 زىمىران ءتۇستى. اۋە شابۋىلىنان 2 ادام قازا تاپتى. تاعى ءبىر تۇرعىن قۇتقارىلدى. ۇيىندىلەر استىندا ادامدار بار.
ال امەريكالىق جەكەمەنشىك كومپانيا قورشاۋعا الىنعان ماريۋپول قالاسىنىڭ جەرسەرىگىنەن تۇسىرگەن سۋرەتتەرىن كورسەتتى. ولاردان قالادا تۇتىندەگەن ۇيلەر مەن قيراعان عيماراتتاردى كورۋگە بولادى. مالىمەتكە قاراعاندا كەشە رەسەي كۇشتەرى ماريۋپولدان شىققان كولىكتەر كەرۋەنىنىڭ العاشقى بولىگىن شىعارعانىمەن، شاھارعا گۋمانيتارلىق كومەكتى كىرگىزبەي قويعان. ۋكراينانىڭ وڭتۇسىگىندەگى ماريۋپول قالاسى كوپ كۇننەن بەرى قورشاۋدا.
