ەلدەگى ماينينگتىك كومپانيالارعا بولات نازاربايەۆ پەن ەرلان نىعماتۋلليننىڭ قاتىسى بار

نۇر-سۇلتان. قازاقپارات – ەلدەگى ماينينگتىك كومپانيالارعا بولات نازاربايەۆ پەن ەرلان نىعماتۋلليننىڭ قاتىسى بار.

بۇل تۋرالى «حابار 24» قارجى نارىعىن رەتتەۋ جانە دامىتۋ اگەنتتىگىنە سىلتەمە جاساپ حابارلايدى.

ماينينگتىك فيرمالارعا قاتىستى QazaqGaz ۇلتتىق كومپانياسىنىڭ بۇرىنعى باسقارما ءتوراعاسى قايرات شارىپبايەۆ پەن كاسىپكەر الەكساندر كلەبانوۆتىڭ دا اتتارى اتالادى.

مالىمەتتەرگە قاراعاندا بۇل فەرمالار پاۆلودار، اقتوبە جانە قاراعاندى وبلىستارىندا جۇمىس ىستەگەن. سونىمەن قاتار جاسىرىن جۇمىس ىستەگەن تاعى 51 فەرما انىقتالدى. ولار ارنايى ەكونوميكالىق ايماقتا ورنالاسقان جانە ەلەكتر جەلىلەرىنە زاڭسىز قوسىلىپ، سالىق تولەمەگەن.

گاۋحار ساپاربايەۆا، قارجى نارىعىن رەتتەۋ جانە دامىتۋ اگەنتتىگىنىڭ رەسمي وكىلى:

- زاڭسىز قىزمەتتى جۇزەگە اسىرعان ماينينگتىك كومپانيالاردىڭ اراسىندا قازاقستاننىڭ ەڭ باي كاسىپكەرلەرىنىڭ ءبىرى قايرات يتەمگەنوۆپەن ۇلەستەس فيرمالار بار. ونىمەن قوسا، ىشكى ىستەر مينيسترلىگى دەپارتامەنتىنىڭ بۇرىنعى باسشىسى تىلەگەن ماتكەنوۆتىڭ دە قاتىسى بار. ماينينگكە ارنالعان جابدىقتار قىتاي، وڭتۇستىك كورەيا، سينگاپۋر، تۇركيا جانە گرۋزيا ەلدەرىنەن اكەلىنگەن. ولاردى اكەلۋ كونتراباندالىق تاسىلمەن دە جۇزەگە اسىرىلدى. قىتايدان الماتىعا 2,8 ميلليارد تەڭگەگە ءبىر مىڭنان استام ماينينگتىك جابدىق اكەلىندى. قارجى مونيتورينگى اگەنتتىگى بارلىعى 25 قىلمىستىق ءىستى تىركەدى. قۇنى 100 ميلليارد تەڭگەگە جۋىق 67 مىڭنان استام جابدىق تاركىلەندى.