قايرات ساتىبالدى ۇلىنىڭ باسقا قىلمىستارعا قاتىستىلىعى تەكسەرىلىپ جاتىر

نۇر- سۇلتان. قازاقپارات - قايرات ساتىبالدى ۇلىنىڭ مەملەكەت قاۋىپسىزدىگىنە نۇقسان كەلتىرەتىن باسقا قىلمىستارعا قاتىستىلىعى تەكسەرىلىپ جاتىر.

بۇل تۋرالى سىبايلاس جەمقورلىققا قارسى ءىس- قيمىل اگەنتتىگىنىڭ ءتوراعاسى ولجاس بەكتەنوۆ ايتتى، دەپ حابارلايدى قازاقپارات ءتىلشىسى.

بۇگىن ءماجىلىستىڭ جالپى وتىرىسىنان كەيىن تىلشىلەر اگەنتتىك باسشىسىنان «قازاق تەلەكومنان» قاراجات جىمقىرۋ ءىسى بويىنشا كۇدىكتى قايرات ساتىبالدى ۇلىنىڭ قاڭتار وقيعاسىنا قاتىستىلىعى تەكسەرىلىپ جاتىر ما؟» دەگەن سۇراق قويدى.

ءوز كەزەگىندە ولجاس بەكتەنوۆ كەشە تاراتىلعان اقپاراتتا قاڭتار وقيعاسى تۋرالى ايتىلماعانىن ەسكە سالدى.

«مەملەكەت قاۋىپسىزدىگىنە نۇقسان كەلتىرەتىن باسقا قىلمىستارعا قاتىستىلىعى تەكسەرىلىپ جاتىر. وسى فاكتىلەردىڭ بارلىعى قارالادى. ونى (ق. ساتىبالدى ۇلى) ءبىزدىڭ قىزمەتكەرلەر ۇستادى. ءبىزدىڭ اقپارات بويىنشا دۋبايعا (ۇشاقپەن) كەتپەك بولعان»، - دەدى اگەنتتىك باسشىسى.

بۇدان بۇرىن حابارلانعانداي، سىبايلاس جەمقورلىققا قارسى قىزمەت لاۋازىمدىق وكىلەتتىكتەرىن اسىرا پايدالانۋ جانە «قازاق تەلەكوم» ا ق- نىڭ قاراجاتىن اسا ءىرى كولەمدە ۇرلاۋ فاكتىلەرى بويىنشا قىلمىستىق ءىستى تەرگەۋدە.

اتالعان قىلمىستاردى جاسادى دەگەن كۇدىكپەن قايرات ساتىبالدى ۇلى ۇستالىپ، ۋاقىتشا ۇستاۋ يزولياتورىنا قامالدى.

***

قايرات ساتىبالدى ۇلى - نۇرسۇلتان نازاربايەۆتىڭ تۋعان ءىنىسى ساتىبالدىنىڭ ۇلى. ول باۋىرجان مومىش ۇلى اتىنداعى اسكەري مەكتەپ- ينتەرناتتان تۇلەپ ۇشقان، ودان كەيىنگى جىلدارى بۇل سالاداعى بىلىكتىلىگىن ۋچيليشەدە، سوسىن ۇ ق ك- ءنىڭ جوعارعى كۋرستارىندا شىڭداپتى. 1990- جىلداردىڭ باسىندا ءبىر جىل ۆزۆود كومانديرى بولعان. 1991-98 -جىلدار ارالىعىندا ۇلتتىق قاۋىپسىزدىك ورگاندارىندا قىزمەت ەتكەن.

قايرات ساتىبالدى ۇلىنىڭ بيلىكتەگى قىزمەتى 1991 -جىلدان - ۇلتتىق قاۋىپسىزدىك كوميتەتىنە (ۇ ق ك) كەلگەن كەزىنەن باستالعان. ول بۇدان كەيىن استانا قالاسى اكىمىنىڭ ورىنباسارى (1998-2000)، «قازاق ويل» كومپانياسىنىڭ ۆيتسە- پرەزيدەنتى (2000-2003)، ۇ ق ك كادر دەپارتامەنتىنىڭ ديرەكتورى (2003-2005)، «قازاقستان تەمىر جولى» كومپانياسىنىڭ ۆيتسە- پرەزيدەنتى (2005-2006)، «دۇنيە» كورپوراتسياسى» اكسيونەرلىك قوعامىنىڭ ديرەكتورلار كەڭەسى ءتوراعاسى (2006-2010) بولعان. ال 2010-2015 - جىلدارى - «نۇر وتان» پارتياسىنىڭ حاتشىسى قىزمەتىن اتقاردى.

2016 -جىلدان باستاپ — Alatau Capital Invest باسقارۋشى سەرىكتەسى بولدى.

باسقا دا قىزمەتتەرى:

«قازاقستان رەسپۋبليكاسىنىڭ ۇلتتىق سپورت تۇرلەرى قاۋىمداستىعىنىڭ» ز ت ب پرەزيدەنتى بولدى. «كوك ءبورى» حالىقارالىق فەدەراتسياسىنىڭ پرەزيدەنتى بولىپ قىزمەت اتقاردى. «اق وردا» رەسپۋبليكالىق قوزعالىسى ق ب ءتوراعاسى بولىپ تاعايىندالدى.

اۆتور: رۋسلان عابباسوۆ