قورىلداپ ۇيىقتاعان زيان با؟
الايدا ءجيى قورىلداۋ، قاتتى قورىلداۋ سىندى بەلگىلەرى اۋرۋدان حابار بەرۋى مۇمكىن دەيدى ماماندار.
ماسەلەن، كلينيكالىق مەديتسينانىڭ اديۋنكت-پروفەسسورى، دوكتور رادج داسگۋپتا (ا ق ش، كاليفورنيا ۋنيۆەرسيتەتى) قورىلدىڭ دەنساۋلىققا زيان با الدە قالىپتى جاعداي ما - وسى ەكەۋىن اجىراتۋ ءۇشىن مىناداي بەلگىلەرگە ءمان بەرۋ كەرەگىن ايتادى.
«ەڭ الدىمەن، قورىلدىڭ ۇنىنە، دىبىس قاتتىلىعىنا ءمان بەرىڭىز. ادامنىڭ قاتتى قورىلداۋى جاقسى ەمەس. بۇل جەردە «قاتتى قورىلداۋ» دەپ نەنى ايتامىز؟ ەگەر قورىلداعان ادامنىڭ داۋىسى كەلەسى قابىرعادان ءوتىپ، كەلەسى بولمەدەگى ادامعا ەستىلىپ جاتسا، بۇل دەگەنىمىز ناعىز قاتتى قورىل»، - دەيدى دارىگەر.
دوكتوردىڭ ايتۋىنشا، تۇندە كوپ قورىلدايتىن، اسىرەسە، دەم جەتپەي، تىنىس الا الماي قورىلدايتىن ادامنىڭ ۇيقىسى شالا بولادى. سوندىقتان كۇنى بويى شارشاڭقى، نازارى شاشىراڭقى ءجۇرۋى مۇمكىن. ۇيقى قىسۋى دا سودان.
«ۇيىقتاپ جاتىپ تىنىس جەتپەي، ويانىپ كەتەتىندەر بولادى. بۇل دا جاقسى نارسە ەمەس. ەڭ دۇرىسى دارىگەرگە قارالعانىڭىز ءجون»، - دەيدى رادج داسگۋپتا.
دارىگەردىڭ ايتۋىنشا، ءجيى قورىلداۋدىڭ ءبىر سەبەبى - قان قىسىمىنان بولۋى مۇمكىن. اسىرەسە، جوعارى قان قىسىمى بار (گيپەرتونيا) ادامدار تۇندە قاتتى قورىلداپ، دەم جەتپەي قىسىلۋى مۇمكىن.
«دەم جەتپەگەن كەزدە ادام اعزاسىندا سترەسس گورموندارى ءبولىنىپ، سودان قان قىسىمى كوتەرىلەدى»، - دەيدى ول.
ونىڭ ايتۋىنشا، سالماعى كوپ، مويىنى جۋان ادامدار دا قورىلداۋعا بەيىم كەلەدى ەكەن.
«سەمىز ادامنىڭ ارتىق سالماعى مويىن مەن كومەيگە قىسىم تۇسىرەدى دە، اعزاعا اۋا جەتپەي، قورىل پايدا بولادى. ادامنىڭ ءوزى تۇندە قورىلداپ ۇيىقتايتىنىن بىلمەۋى مۇمكىن. تىنىسى جەتپەي، دەم تارىلۋىن دا سەزبەۋى مۇمكىن. ءبىراق سەمىز ادامنىڭ كوبى تۇنگى اپنوەدەن (دەم جەتپەۋ) زارداپ شەگەدى»، - دەيدى داسگۋپتا.
massaget.kz
