ۋكرايناداعى رەسەي مۇلىكتەرى تۇگەل تاركىلەنەدى - زەلەنسكي قول قويدى

نۇر-سۇلتان. قازاقپارات - ۋكراينا پرەزيدەنتى ۆ. زەلەنسكي ەل اۋماعىنداعى ر ف مەن ونىڭ رەزيدەنتتەرىنىڭ دۇنيە- مۇلكىن تولىقتاي تاركىلەۋ تۋرالى زاڭعا قول قويدى.

بۇل جايلى جوعارعى رادانىڭ باسپا ءسوز قىزمەتى حابارلادى.

باسپا ءسوز قىزمەتىنىڭ حابارلاۋىنشا، رەسەيدىڭ ۋكراينا جەرىنە باسىپ كىرۋىنەن، سوعىستىڭ كەسىرىنەن ەلدىڭ شىعىنى كوبەيىپ كەتتى. سونى تولتىرۋ ءۇشىن ۋكراينا ۇكىمەتى رەسەيدىڭ مەنشىگىندەگى دۇنيە-مۇلىكتەردى تاركىلەپ، ەل مۇددەسى ءۇشىن جۇمساماق. ءارى وعان ەشقانداي وتەماقى تولەنبەيدى.

جوعارعى رادا بۇل زاڭدى 4- ناۋرىز كۇنى قابىلداعان. بۇگىن مىنە، پرەزيدەنت ۆ. زەلەنسكي قول قويىپ وتىر.

«تاركىلەنگەن دۇنيە-مۇلىكتىڭ قارجىسى اگرەسسور ەلدىڭ كەسىرىنەن قيراپ قالعان ۋكراينا قالالارىن قالپىنا كەلتىرۋگە جۇمسالادى»، - دەدى دەپۋتات ماريا مەزەنتسيەۆا.

ايتا كەتەيىك، رەسەي ۇكىمەتى دە ەلدەن كەتكەن شەتەلدىك كومپانيالاردىڭ دۇنيە-مۇلىكتەرى تاركىلەنەتىنىن مالىمدەگەن ەكەن.

bugin.kz