سەناتور بارلىق وڭىردە تەرى مەن ءجۇندى قابىلداۋدىڭ پۋنكتتەرىن قۇرۋدى ۇسىندى

نۇر- سۇلتان. قازاقپارات - وتاندىق توقىما ءجۇن ونىمدەرىن وندىرۋشىلەر كۇردەلى شيكىزات تاپشىلىعىن باستان كەشىپ وتىرعاندا، ءجۇن وندىرۋشىلەر قاراپايىم جانە ءتيىمدى تەحنولوگيالارعا، سونداي- اق وندىرىلگەن شيكىزاتتى قايتا وڭدەيتىن بيزنەستى قولداۋعا مۇقتاج بولىپ وتىر.

بۇل تۋرالى سەناتور مۇحتار جۇماعازيەۆ ەلىمىزدىڭ پرەمەر- ءمينيسترىنىڭ اتىنا جولداعان دەپۋتاتتىق ساۋالىندا ايتتى، دەپ حابارلايدى قازاقپارات ءتىلشىسى.

قوي وسىرۋمەن ەلىمىزدە 4 مىڭعا جۋىق اۋىل شارۋاشىلىعى تاۋارلارىن وندىرۋشىلەر اينالىسادى، ال ءجۇن وڭدەيتىن زاۋىتى نەبارى - 13. سونىمەن بىرگە، قولدا بار دەرەكتەر بويىنشا، سۇرانىستىڭ جوقتىعىنان نەمەسە شيكىزات بولماعاندىقتان وتكەن جىلى ءجۇن وڭدەيتىن 6 كاسىپورىن جۇمىس ىستەگەن جوق، ال ىستەپ تۇرعان 7 كاسىپورىننىڭ جۇكتەلۋى جالپى العاندا % 30- دى عانا قۇراعان.

«وتاندىق الىپ- ساتارلار تەك بيازى قوي ءجۇنىنىڭ ءبىر كەلىسىن 100-150 تەڭگەدەن قابىلدايدى. ال ءبىر قويدى قىرقۋعا كەتەتىن شىعىن 300-500 تەڭگەگە دەيىن. ونىڭ ۇستىنە ءجۇندى وتكىزۋ ماسەلەسى دە جولعا قويىلماعانىنا بايلانىستى شارۋالار ورتەپ جىبەرۋگە ءماجبۇر»، - دەپ اتاپ ءوتتى م. جۇماعازيەۆ سەناتتىڭ جالپى وتىرىسىندا.

دەپۋتاتتىڭ ايتۋىنشا، قازىر ءجۇن وڭدەۋ كاسىپورىندارىن اۋماقتىق ءبولۋ تاسىلدەرىن قايتا قۇرۋ جانە جاڭا تەحنولوگيالىق وندىرىستەر قۇرۋ ماڭىزدى. سەناتور وسىنداي شارۋالارعا مەملەكەتتىك قولداۋ شارالارىن جەتىلدىرۋدى ۇسىندى. ەلدى يندۋستريالىق- يننوۆاتسيالىق دامىتۋدىڭ 2020-2025 -جىلدارعا ارنالعان مەملەكەتتىك باعدارلاماسى اياسىنداعى ينۆەستيتسيالىق سۋبسيديالار وسى سالاعا جەرگىلىكتى، سونداي- اق شەتەلدىك ينۆەستيتسيالار اعىنىن ىنتالاندىرۋعا مۇمكىندىك بەرەدى.

«سالا ماماندارىنىڭ پىكىرىنشە، وسىنداي جاعداي ءجۇن وڭدەۋ ماسەلەلەرى ەكى ۋاكىلەتتى ورگانعا تيەسىلى بولۋىنان تۋىنداپ وتىر. ماسەلەن، شيكىزات ءوندىرۋ جانە تەرى مەن ءجۇندى باستاپقى وڭدەۋ ماسەلەلەرى اۋىل شارۋاشىلىعى مينيسترلىگىنىڭ قۇزىرىنا جاتادى، ال تەرەڭ وڭدەۋ يندۋستريا جانە ينفراقۇرىلىمدىق دامۋ مينيسترلىگىنە قارايدى. ناتيجەسىندە، ىسكە اسىرىلاتىن ينۆەستيتسيالىق پرەفەرەنتسيالار مەن مەملەكەتتىك قولداۋ شارالارى ءبىر- ءبىرىن جالعاستىرىپ، تولىقتىرمايدى، كەيبىر ماسەلەلەر بويىنشا بەلگىلى ءبىر قيىندىقتاردى دا تۋعىزىپ وتىر»، - دەدى دەپۋتات.

سەناتور سونداي- اق جاعدايدى جاقسارتۋ ءۇشىن ءبىرقاتار ۇسىنىستار ايتتى. ولاردىڭ ىشىندە اۋىل شارۋاشىلىعى مينيسترلىگىنە قولدانىستاعى اگروونەركاسىپتىك كەشەندى مەملەكەتتىك قولداۋ باعدارلامالارىنا تەرى مەن ءجۇندى تەرەڭ وڭدەۋ جونىندەگى جوبالاردى ەنگىزۋ بويىنشا وكىلەتتىكتەر بەرۋ. سونداي- اق، ول وسى سالاداعى جوبالاردى سۋبسيديالاۋ جانە قوي شارۋاشىلىعى شارۋاشىلىقتارى مەن تۇرعىنداردان ءجۇن ساتىپ الۋدىڭ ورتالىقتاندىرىلعان جۇيەسىن ۇيىمداستىرۋ ماقساتىندا ەلىمىزدىڭ بارلىق وڭىرىندە تەرى مەن ءجۇندى قابىلداۋ بويىنشا سەرۆيستىك- دايىنداۋ پۋنكتتەرىن قۇرۋ تۋرالى ماسەلەلەردى قوزعادى.

اۆتور: رۋسلان عابباسوۆ