قازاقستانعا رەسەيلىك كادرلار اعىلا ما: مينيستر جاۋابى

نۇر-سۇلتان. قازاقپارات - قازاقستان نارىعىنا رەسەيلىك كادرلاردىڭ جاپپاي كەلۋى بايقالمايدى.

بۇل تۋرالى ق ر ەڭبەك جانە حالىقتى الەۋمەتتىك قورعاۋ ءمينيسترى سەرىك شاپكەنوۆ ايتتى، دەپ حابارلايدى قازاقپارات ءتىلشىسى.

«قازىرگى ۋاقىتتا ءجىتى باقىلاپ وتىرمىز. بۇگىندە رەسەيلىك ازاماتتاردىڭ بىزگە جۇمىس ىستەۋگە جاپپاي كەلۋى بايقالمايدى»، - دەدى ول ۇكىمەت وتىرىسىنان كەيىن ب ا ق وكىلدەرىنىڭ ساۋالىنا وراي.

سونىمەن قاتار مينيستر مامانداردىڭ جاپپاي كەلۋى انىقتالعان جاعدايدا قازاقستان قانداي ءىس-شارا قولعا الاتىنىن ايتتى.

«قازاقستان، رەسەي، ارمەنيا، بەلارۋس، قىرعىزستان ءبىر ەكونوميكالىق وداققا كىرەدى. سوندىقتان ەڭبەك رەسۋرستارى ەش كەدەرگىسىز اۋىسا الادى. بۇل - ءبىرتۇتاس ەڭبەك نارىعى. قازىر دە، وسى ۋاقىتقا دەيىن دە ولار بىزگە جۇمىس ىستەۋگە ەمىن- ەركىن كەلە الدى. ەڭبەك كۇشى جاپپاي كەلسە ءبىز نە ىستەي الامىز؟ قابىلدايتىن ءىس-شارامىز - بۇل جۇمىس ورىندارىن مونيتورينگىلەۋ. ياعني، جۇمىسپەن قامتۋ ورتالىقتارى ارقىلى ەڭ الدىمەن، ءوزىمىزدىڭ ازاماتتاردى جۇمىسقا ورنالاستىرامىز»، - دەدى سەرىك شاپكەنوۆ.

مينيستر ەڭ الدىمەن بولاشاقتا قاجەت بولاتىن ماماندىقتاردى ايقىنداپ الۋ قاجەتتىگىنە نازار اۋدارتتى. «ءبىز جاستاردىڭ 40 پايىزىنا ساۋالناما جۇرگىزدىك جانە ولار وزدەرىنىڭ ماماندىقتارىن تاڭداماعان بولىپ شىقتى. رەسەيدىڭ نەمەسە بەلارۋستىڭ كەز كەلگەن ازاماتى بىزگە جۇمىس ىستەۋگە كەلە الادى. سول سياقتى ءبىزدىڭ ازاماتتاردىڭ جۇمىس ىستەۋگە بارۋ مۇمكىندىگى بار»، - دەدى ول.