قازاقستاندا ينتەرنەت جىلدامدىعى قانداي
بۇل جايىندا تەلەكوممۋنيكاتسيا نارىعىن دەمونوپوليزاتسيالاۋ ماسەلەلەرى تالقىلانعان Menmedia.kz كروسس- مەدياپلاتفورماسىندا بەلگىلى بولدى، دەپ حابارلايدى قازاقپارات ءتىلشىسى.
«Finprom.kz ساراپتامالىق پروتالىنىڭ مالىمەتىنە سايكەس، قازاقستان موبيلدى ينتەرنەت جىلدامدىعى بويىنشا جاھاندىق رەيتينگتە 80-ورىندا تۇر. جىل باسىنان بەرى ەلىمىزدە ينتەرنەت جىلدامدىعى 62,6 پايىزعا ارتتى. ورتالىق ازيا ەلدەرى ىشىندە قازاقستان موبيلدى ينتەرنەت جىلدامدىعى بويىنشا كوش باسىندا كەلەدى. ال ranking.kz ساراپتاما پورتالى بۇكىل الەمدە ينتەرنەت قوسىلۋىنىڭ جىلدامدىعى مەن ونىمدىلىگىن تەكسەرەتىن Speedtest Global Index مالىمەتتەرىنە سۇيەنە وتىرىپ، قازاقستاندا ءبىر جىل ىشىندە بەكىتىلگەن ينتەرنەتتىڭ ورتاشا جىلدامدىعى سەكۋندىنا 50,74 مبيت-تەن 2021 -جىلدىڭ قازانىندا 62,04 مبيتكە- دەيىن ارتقانىن اتاپ وتەدى. بۇل دا - ورتالىق ازيا ەلدەرى ىشىندەگى ەڭ جوعارى كورسەتكىش سانالادى»، - دەدى ۇلتتىق كوممۋنيكاتسيالار جانە سيفرلاندىرۋ قاۋىمداستىعىنىڭ ۆيتسە-پرەزيدەنتى جانات اسانتايەۆا.
ونىڭ دەرەگىنشە، وتكەن جىلى قازاقستاندىق بايلانىس وپەراتورلارى 1 تريلليون تەڭگەدەن استام پايدا تاپتى.
«نارىق العاش رەت 1 تريلليون تەڭگەلىك بەلگىدەن اسىپ ءتۇستى. ۇلتتىق ستاتيستيكا بيۋروسىنىڭ مالىمەتتەرىنە سايكەس، 2021 -جىلدىڭ قاڭتار- جەلتوقسانىندا تەلەكوممۋنيكاتسيا نارىعىنىڭ كولەمى 2020 -جىلمەن سالىستىرعاندا 12,9 پايىزعا ءوستى»، - دەدى ول.
